नेपाली हास्यव्यङ्ग्य अनलाइन पत्रिका

हतास भएकाहरूमा पलाएको नौलो विश्वास छ केसी
निराश भएकाहरू भित्र जागृत उमङ्गित आश छ केसी
तिम्रो दृढता निडरता जुझारुपनलाई सलाम छ केसी
नेपाली चिकित्सा क्षेत्रको, फर्किरहेको श्वास छ केसी ।

गहन अँध्यारो बीचको सत्य प्रकाश छ केसी
पर्दाफास अब हुन्छ पक्कै एक आभास छ केसी
आमरण उपवासको अभ्यासले रचेको छ इतिहास,
न्यायप्राप्तिको महान यात्रापथको शिलान्यास छ केसी ।

मस्किएर पस्किने कदाचार विरुद्धको प्रयास छ केसी
उदास आँखाहरूमा उदाएको तरङ्गित उल्लास छ केसी,
बन्छु कि कालको ग्रास, कतै पनि थिएन अलि पनि त्रास
न डराउने, नबिराउने तिमीमा केही त खास छ केसी ।

उत्कर्षमा पुगेर जो निकाल्छ निष्कर्ष ऊ छ केसी
स्वास्थ माफिया विरुद्धको अनवरत संघर्ष छ केसी
अरुको जोगाउन, ज्यान दिन तैयार सहर्ष छ केसी
वर्षौं पछि अनुभूत भएको एक उच्च आदर्श छ केसी ।
विराटनगर