नेपाली हास्यव्यङ्ग्य अनलाइन पत्रिका

कोही जान्छ बेजिङ
कोही जान्छ गङ्गा पार
कोही जान्छ बैङ्कक
कोही समुन्द्र पार
इमान्दर रहेछन् नेता
छैनन् ढाँटेको
कुरो बुझी नसक्नु छ
के हो आँटेको ।

कोही औषधी उपचार भन्दै
दिल्लीतिर जान्छन्
भेटघाट गरेपछि आफूलाई
शक्तिशाली ठान्छन्
आलो पालो गरी गरी
सत्ता भत्ता खान्छन्
देशभक्त रहेछन् नेता
छैनन् ढाँटेको
कुरो बुझी नसक्नु छ
के हो आँटेको ।

एकातिर गए भने
आन्दोलन भन्छन्
अर्कोतिर गए भने
सहमति भन्छन्
घरको झगडा पर लगि
रिमोट कन्ट्रोल बन्छन्
राष्ट्रप्रेमी रहेछन् नेता
छैनन् ढाँटेको
कुरो बुझी नसक्नु छ
के हो आँटेको ।
दाङ, हाल– काठमाडौं