नेपाली हास्यव्यङ्ग्य अनलाइन पत्रिका

भारत बन्द कुरो आउँदैन
चाइना बन्द कुरो आउँदैन
नेपाल बन्द चाहिँ
कहाँबाट सिके
को रहेछन् लठक नारायण
यस्तो कुबुद्धि झिके
सात सालदेखि नै यहाँ
आन्दोलन चलिराछ
आन्दोलनले हुने भए
देश किन झन गली रा’छ ?

आन्दोलनले नै देश बन्ने भए
बेरोजगारीलाई
आन्दोलन देऊ
के के हुन्छ फाइदा
मजाले आँफै लेऊ
आन्दोलन हुने भए
पाकिस्तान बङ्गलादेश
कहाँ कहाँ पुग्थे
नेपाली पनि अहिलेसम्म
सेमिनार गए पनि
किन विदेशतिर लुक्थे ?

अझै सद्बुद्धि आउँदैन भने
आन्दोलन चर्काऊ
देश नै थर्काऊ
एक वर्षपछि धकलेर
देशलाई पछी फर्काऊ ।

रेलिङहरू भत्काऊ
पर्खालहरू भत्काऊ
पुलहरू भत्काऊ
नयाँ पुल बनाउँदा
कमिसन तिमीले खाने हो
बाटो भए पनि तिमी त
हावाइमार्गबाट जाने हो
काम नपाएकाहरू पनि
तोडफोडमा रमाउने
आन्दोलनको नाममा
कसैले दाम कमाउने
तिमी पनि पार्टी गर्दै
होटेलतिर नै पस्ने हो
बसे भोकै
जनता त बस्ने हो
फसेछन् भने पनि
कार्यकर्ता फस्ने हो
तिमीले अबिर घस्ने हो
अरु गरेको भए
देश जापान बन्थ्यो होला
सिङ्गापुर बन्थ्यो होला
तिम्रो त पेशा नै यही हो कि
आन्दोलन चर्काऊ
देश नै थर्काऊ
देशलाई घिसारेर
अझ पछि फर्काऊ ।
दाङ, हाल– काठमाडौं