नेपाली हास्यव्यङ्ग्य अनलाइन पत्रिका

कता पूर्व मेची कता दूर काली
सबै बोल्दथे भिन्न भाषा अँगाली
थियो एकरूपीपनाकै त खाँचो
लिई सामु आयौ तिमी एक साँचो ।।

लडेका भिडेका र छुट्टी बसेका
कुनै लाहुरे ज्यान अर्पी मरेका
सहारा नपाएर खुम्ची रहेका
थिए रामकै आशमा झुण्डिएका ।।

तिमी रामको नाम बोकेर आयौ
मिठा शव्दमा श्लोकमा गुन्गुनायौ
उही रामगाथा सबैमा सुनायौ
दिई भक्तिले शक्ति जागा गरायौ ।।

तिमी दीर्घदर्शी कसैले बुझेनन्
बहाना थियो यो कसैले गुनेनन्
बन्यो यै बहाना मियो एकताको 
बन्यो एक भाषा यताको उताको ।।

जहाँसम्म नेपालको नाम हुन्छ
सबै एक जातित्वको काम हुन्छ
यही एक भाषा छ हाम्रो चिनारी
सबै विश्वमा नाम हाम्रो फिंजारी ।।

तिमी देशका एक साँचो सुपुत्र
सयौं जाति जोड्ने तिमी एक सूत्र
तिमी शारदाका गुणी एक भक्त
तिमी राष्ट्रकै रत्न हौ भानुभक्त ।।

काठमाडाैं