नेपाली हास्यव्यङ्ग्य अनलाइन पत्रिका

कति दशकदेखि
सिंहदरबार भित्रै
हराएका छन् ‘पिलरहरू’
मर्मत गर्न नमिल्ने गरी
कुच्चिएका छन ‘पिलरहरू’
सिंहदरबार नै बलियो नभएपछि
हराउने नै भए सिमानाका पिलरहरू
सिंहदरबारको ‘पिलर’ नफेरेको होइन
मर्मत रंग रोगन नगरेको होइन
पिलरका डण्डीनै खिया परेर हो कि
वा कसैले कडा एसिड खन्याएर हो
बाहिरबाट अजङ्गको देखिने
सिंहदरबार
जहिले पनि भत्किने डर भइरह्यो
जब कमजोर बन्छन्
सिंहदरबारका ‘पिलरहरू’
कुच्चिने नै भए सिमानाका पिलरहरू
बेला बखत
सिंहदरबारकै पिलरहरू हराउँछन्
बाहिरबाट खोजेर पुन ठड्याइएको छ
बेला बखत
सिंहदरबारकै पिलर कुन मातले ढल्छन्
कति मुस्किलले सिंहदरबार
बोक्न लगाइएको छ
जब सिंहदरबारकै पिलरहरू
यति चन्चल हुन्छन् भने
भास्सिने नै भए सिमानाका पिलरहरू ।

काठमाडौं