नेपाली हास्यव्यङ्ग्य अनलाइन पत्रिका

ब्यायाम गर्ने भन्दै बिहानै उठ्या छ
तातो पानी, रेस्टरूम ब्रस भन्दै जुट्या छ
हात खुट्टा पनि फन्का छ
जिउ पनि तन्का छ
टेबल टेनिस पनि खेल्या छ
ब्याट्मिन्टन पनि खेल्या छ
ब्रेक फास्टमा अन्डा रेल्या छ
भोक लाग्यो भन्दै
टन्न दाल भात पेल्या छ
डीनरमा मासु ठेल्या छ
अनि भन्छ
तौल पनि उस्तै छ
जिउ पनि उस्तै छ
जति ब्यायाम गरे पनि यार
मेरो भुँडी त जस्ताको तस्तै छ ।

बिहान भर कुद्यो
एकछिन खेलमा जुध्यो
मर्निङ वाकमा पनि गाको छ
जिममा पनि गाको छ
भोक लाग्यो भन्दै
टन्न झोलभात खाको छ
साँझ साथीभाइले मानेन भन्दै
मम सेकुवा लाको छ
अनि भन्छ
जति ब्यायाम गरे नि
तौल पनि बड्या छ
भुँडी पनि बड्या छ
पहिले भन्दा झन
ब्लड प्रेसर चड्या छ ।

टन्न ब्यायाम गरेँ भन्दै
चिल्लो पनि खाको छ
पार्टी भोजमा गयो भने
आज एक दिन भन्दै
ड्रिङ्क्स पनि लाको छ
पेट झन झन उक्स्याको छ
मसल झन फोक्स्या छ
अनि भन्छ
दिनहुँ मर्निङ वाक गाको हो
खेलकुदमा पनि गाको हो
अली अली मात्र खाको हो
हैन हो गाँठे !
जति ब्यायाम गरे नि पेट नघट्ने
यो के भाको हो !

दाङ, हालः काठमाडौं