नेपाली हास्यव्यङ्ग्य अनलाइन पत्रिका

कालो बजारका ठूला माफिया क्या कमाल छन्
उनैका पिछलग्गू यी मालामाल दलाल छन् !

हुन्छ लौ डनको पूजा, तस्करी छैन निन्दित
राज्यका दृष्टिमा सच्चा यिनै कर्मठ ‘लाल’ छन् !

तस्करैले टिकाएका रहेछन् राष्ट्रको साख
राज्यका के कुरा पूरै अन्तर्राष्ट्रिय जाल छन् !

जति भ्रष्ट भयो मान्छे उति नै मान पाइने
त्यसैले वस्त्र, खाद्यान्न, न जस्ता, न त्रिपाल छन् !

जेलबाट छुटेकैमा माला सय किलो हुने
भ्रष्टका स्वागतार्थीमा उनै ‘कल्लु–कलाल’ छन् !

ढोका अवश्य हात्तीका देखिने दाँतझैँ बने
लुकेरै फुत्त पस्ने यो भित्तामा कति झ्याल छन् !

पसेको– निस्किएको यो देख्नै सक्छ र को यहाँ ?
झ्याल मात्र कहाँ यस्ता अनेकौं खटप्वाल छन् !

गरी हिम्मत यो जालो काट्न तत्पर को हुने ?
तेर्छिएका तगारा छन्, अनगिन्ती बबाल छन् !

दाङ