नेपाली हास्यव्यङ्ग्य अनलाइन पत्रिका

बिगार्नेहरूहो बनाएर हेर
फुटाल्नेहरू जोर्न ता जोरिहेर
फुटे बालुवा जोरिए शैल बन्छ
महान् जोर्छ फोर्ने सधैं दुष्ट हुन्छ ।

यता एक कैंची छ जो काट्न सक्छ
धुजा पार्छ सिङ्गो फुटाएर छर्छ
उता माडले टाँस्छ टुक्रा मिलाई
यसैले भलो गर्छ यो विश्वलाई ।

तिमी माड बन्ने कि कैंची विचार
सके एकतामा नगर्नू प्रहार
तिमी आज ता हाँस्न सक्छौ भविष्य
तिमीमाथि धिक्कार गर्ला अवश्य ।

बडो दुःखले जोरिएको छ देश
सयौं जातिको धर्मको भिन्न वेष
मिलेको मुठी खोल्न कोही नखोज्नू
कुनै दुष्ट पाखण्ड जालो नरच्नू ।

नमस्कार गर्छौं सबै लाखवार
यहाँ भेदको तुच्छ लेदो नफार
सँगै छौं सँगै नित्य हामी रहन्छौं
व्यथा होस् मजा होस् मिलेरै सहन्छौं ।

काठमाडौं