नेपाली हास्यव्यङ्ग्य अनलाइन पत्रिका

कुनै भन्छ टुक्रा गरी भाग लाऊँ
कुनै भन्छ देऊ कलेजो म खाऊँ
लुछी सेकुवा खान यी सल्बलाए
र, यो देशलाई खरानी बनाए ।

थियो विश्वमा शान्तिको पुज्य ठाऊँ
चिनारी थियो बुद्धको एक नाऊँ
बिरानो कुनै त्यो कहानी तुल्याए
र, यो देशलाई खरानी बनाए ।

छ माटो सुनौलो धरा उर्वरा छन्
यहीँ स्वर्ग झुल्ने पखेरा गरा छन्
सबै सिर्जनामाथि आगो खन्याए
र, यो देशलाई खरानी बनाए ।

बोलाएर व्याधा चढाई सुपारी
छ यो राष्ट्रमा मृत्युको खेल जारी
यताका उताका मलामी जुटाए
र, यो देशलाई खरानी बनाए ।

न आमा भने मर्ममा हात हाले
उँखुझैं बनाए चुसी स्वाद फाले
डढाएर खोस्टा रसेटो तताए
र, यो देशलाई खरानी बनाए ।

यहीँ कस्तुरी मृतसञ्जीवनी छन्
यहीँ प्रेम बर्षाउने जीवनी छन्
सबै सम्पदामा डढेलो लगाए
र, यो देशलाई खरानी बनाए ।

उतैको छ गोली निशाना उतैको
छ बोक्सी उतैको र धामी उतैको
सलाई उतैबाट कोरी पठाए
र, यो देशलाई खरानी बनाए ।

दुःखेको छ छाती कहाँ भन्न जाऊँ
चढाऊँ कहाँ बिन्ति मैले बिसाऊँ
थुनी चोक नाका रत्यौली मनाए
र, यो देशलाई खरानी बनाए ।