नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
मनमा अपराध पाल्नेको उठेको नूर हुँदैन
दूरी बढाउँदैमा मनभित्रको मान्छे दूर हुँदैन
मनको इजलाशबाट स्थापित नजीर भन्दैछु
आँखै आँखाबाट गरिएको संवाद कसुर हुँदैन ।

२.
हुनुपर्छ, चिन्दै नचिनेका पनि ताकेर बगली आउँछन्
काम आफ्नो परेको छ भने हात मलीमली आउँछन्
आकस्मिकताहरूको चक्रव्यूह रहेछ जीवन भन्नु पनि
दिनहुँ आकस्मिकताहरू नकाव बदलीबदली आउँछन् ।

३.
आफै साहु र आफै आसामी को को हुनुहुन्छ ?
को को गुमनाम यहाँ बेनामी को को हुनुहुन्छ ?
प्रश्न गर्दै थियो मलामीहरूसँग घाटको चिताले
भन्नुस् आफ्नै स्वप्नका मलामी को को हुनुहुन्छ ?

४.
सन्तप्त नयन छन् मनभित्र पिर परेजस्ता छन्
आफैले बाँचिरहेको वर्तमानसँग डरेजस्ता छन्
चरित्र देखेर मलामीको चकित लासले सोच्यो
जिउँदा मान्छेहरू मभन्दा पनि धेरै मरेजस्ता छन् ।

०००
भैरहवा