नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
चुहिने भाँडाका सबै तरल पदार्थ चुहिएरै सकिन्छन्
कुहिएकाको सङ्गतमा सद्धे पनि कुहिएरै सकिन्छन्
चल्नेछ चलिरहनेछ नित्य उत्थान पतनको सिलसिला
अवैध सम्बन्धका भ्रूणहरू क्रमशः तुहिएरै सकिन्छन् ।

२.
कसले के गुमायो कसले के पायो प्रश्न बाँकी छ
कसको पसिना कसले लुटी खायो प्रश्न बाँकी छ
नाङ्गा खुट्टातर्फ हेरेर प्रश्न सोध्दै थियो फुटपाथले
श्रमजीवी वर्गमा के परिवर्तन आयो प्रश्न बाँकी छ ?

३.
अकस्मात झरिएछ भने त्यो छुट्टै कुरा हो
वाध्यतामा परिएछ भने त्यो छुट्टै कुरा हो
सङ्घर्ष जारी रहन्छ जिन्दगी नझर्दासम्म
पुक्लुक्कै मरिएछ भने त्यो छुट्टै कुरा हो ।

४.
सुखले एकछिन बस्न दिन्न सताई सताई जान्छ
कैले वल्लो कैले पल्लो तट घुमाई घुमाई जान्छ
आँसु र रोदनको दस्तावेज पो रहेछ कि जिन्दगी
आउँदा रोई रोई आउँछ जाँदा रुवाई रुवाई जान्छ ।

०००
भैरहवा