नेपाली हास्यव्यङ्ग्य अनलाइन पत्रिका

दीनानाथ पोख्रेल :

घट्छ आयु जान यो चुरोट दुष्ट दुस्मन ।
लिन्छ जो धुवाँ सधैँ गलाउने छ यो तन ।
वृद्धिबाट बन्छ जो मनुष्य वृद्ध सानले ।
शक्ति घट्छ व्यक्तिको धुवाँ र मद्यपानले ।।०१।।

यत्रतत्र फ्याँक्दछन् धुवाँ प्रशस्त छन् खल ।
फ्याँक्नुपर्छ दूरमा सबै विचारका मल ।।
रोग पस्छ देहमा अशुद्ध खानपान‌ले ।
शाक्ति घट्छ व्यक्तिको धुवाँ र मद्यपानले ।।०२।।

गर्नु हुन्न कष्टका सुकाम हुन् बुझौँ बल ।
बुद्धिसाथ कर्म को गरौँ उठेर होस् हल ।।
कर्ममार्ग योग्य होस् चुलिन्छ हर्ष मानले ।
शक्ति घट्‌छ व्यक्तिको धुवाँ र मद्यपानले ।।०३।।

धुम्रपान शत्रु हो नराख छेउमा कहीँ ।
यो नसा खराब हो बुझे खुसी जहीँतहीँ ।।
चल्छ देह चेत यो सुयोग्य खानपानले ।
शक्ति घट्‌छ व्यक्तिको धुवाँ र मद्यपानले ।।०४।।

कर्म गर्न जुट्‌छ जो अनन्त शक्ति जोर्दछ ।
प्रेमसाथ कर्मले अनन्त प्राप्ति गोड्‌दछ ।।
बन्छ पूज्य व्यक्ति त्यो अनन्त कर्मदानले ।
शक्ति घट्छ व्यक्तिको धुवाँ र मद्यपानले ।।०५।।

०००
सुम्बेक, इलाम-२ इलाम