नेपाली हास्यव्यङ्ग्य अनलाइन पत्रिका

ठूलो बिजिनेस हाउस । एउटा शहरमा मात्र होइन, कारोबार यत्रतत्र लगानीकर्ताहरू पनि थुप्रै । कुनै कुनै लगानी कर्ताको कारोबार बिदेशमा पनि । रोजगारी खोज्ने युवा युवती योग्यता अनुसार काम पाउन सफल । देशभन्दा फरक व्यवस्थापन । राजनीति नास्ति । त्यसैले कारोबार प्रगतिपथमा । एमडी भोला अचेल नेपालको कारोबार हेर्छन् । उनको अफिसमा एउटी पिए नानी नियुक्त भएकी छिन्– नाम– कामना ।

“सर, म भित्र आउन सक्छु”– कामना ।
“हुन्छ, ढोका खुला छ ।”– भोला ।
कामनाको प्रवेश । लवाइ सामान्य । आँखा लजालु ।
“कामनाजी, केही भन्नुथियो कि ?” भोला औपचारिक भाषामा कुरा गर्छ मात्र प्रोफेसनल ।
“सर, भोलि मेरो जन्मदिन ।” निकै धक मानेर बोलिन् कामना ।
“अग्रीम बधाई !” बोली उस्तै । रुचि विहीन ।
“हजुरलाई निम्तो गर्न चाहेको, फुर्सद होला ?” अझ डर उस्तै ।
“म भोलि नै भन्छु । धेरै ठाउँमा जानु छ । फुर्सद निस्के कामनाजीको कामना पूरा गर्ने कोशिस गर्छु, वाचा होइन ।” अलि नरम ।
……
“अरु पाहुना ?” कामनाको कोठामा पुग्ने बितिक्कै कोही नदेखेर भोलाले पहिलो प्रश्न यही गर्यो ।
“हजुर मात्र ।” अलि हक देखाएर बोलिन् कामना । “ए… ए…, यो केटीको योजना राम्रै रहेछ । सायद यसले मेरो पार्टनर उमेश जस्तै ठानी मलाई पनि । आज जिल्ल पर्छे । साला नामर्द भन्ली !” मनमनै यस्तो सोच्यो भोलाले ।

“सर, के सोच्नुभएको ? यता बसौं ।” हात समाउन पो आइपुगिन् ।
“कामना, बिहे गर ।” भोलाले यत्ति भन्यो । यो उनको लागि अप्रत्याशित ।
“सर, हजुर पनि एक्लै, म पनि एक्लै । आजको रात ….।”

“कामना, तिम्रो यो चाहिँ कामना पूरा हुन्न । म आफ्नो स्टाफको मनोबल नगिरोस् भनेर तिम्रो निम्तो मान्न आएको हुँ । म जीवनमा ‘बोर्डर’ अर्थात् ‘लक्ष्मण–रेखा’ पार गर्दिन । पारिवारिक जीवनको मूल्य र विश्वास मलाई थाहा छ । तिमीले सोचे जस्तो कम्जोर लोग्नेमान्छे म होइन । तिमीभन्दा लाखगुणा सुन्दर र सुशील जीवनसंगिनी छिन् मेरी । तिमी कुन्ती होइनौ र म सूर्य होइन । मलाई माफ गर । आफूलाई सुधार । तिमी मेरो साथीको बहिनी पनि हौ तर साथीमाथि उपकार गरेर मैले तिमीलाई जागिर दिएको होइन । यसरी हाकिम खुसी पार्नुपर्दैन । भूल मान्छेबाट हुन्छ्र तिमीलाई एक पटक केही भन्दिन । जन्म दिनको शुभकामना ! गुड नाइट !”

अर्को दिन कामना अफिस गइनन् । लगातार सात दिन अनुपस्थित । आठौँ दिन उनी अमेरिका उडेको खबर आयो ।

चितवन