नेपाली हास्यव्यङ्ग्य अनलाइन पत्रिका

किसान हक अधिकारका कुरा गर्ने
भिमदत्त पन्तको टाउको काट्ने
विदेशमा कमाएको रेमिटेन्स
विदेशीसँग अन्नमा साट्ने
र, आफूलाई ‘कृषि प्रधान देश’ भनेर
कहिल्यै नथाक्ने
म इतिहांस हुँ यो देशको !

जंगवहादुरहरूको जय गाउने
भिमसेन थापाहरूले चैं सजाय पाउने
अनि सहिद र सहिद बनाउनेहरूलाई
एकसाथ माला लाउने
म इतिहास हुँ यो देशको !

राष्ट्रियता र जनजिविकाको भर्याङ चढेर
सत्तामा जाने
आफ्ना आसेपासेहरू समेतलाई छानी छानी लाने
र, मिलाएर आलो पालो यो देशको सर्वश्व खाने
म इतिहास हुँ यो देशको !

सदियौंदेखि द्वेष, विभाजन वा फुट
दल, त्यसभित्र गुट अनि उपगुट
र, धोका बेईमानी वा झुटको खेतीमा रमाउने
म इतिहास हुँ यो देशको !

सोझा जनतालाई वर्गिय मुक्तिको पाठ पढाउने
क्रान्तिका नाउँमा बारबार तिनको बलि चढाउने
र तिनकै लासमाथि आफ्नो महल ठड्याउने
म इतिहास हुँ यो देशको !

ह्रटाैडा