नेपाली हास्यव्यङ्ग्य अनलाइन पत्रिका

देवघाट, महेश आश्रममा बस्थेँ । एक ताका शुद्ध नेपाली बोल्ने भूत चढ्यो । कामविशेषले नारायणगढ जानू थियो । रोयल देवघाट चढेँ र पोखरा बसपार्क पुगेँ । रिक्सा चढ्ने सोच बनाएँ ।
विनम्र भएर रिक्सावालासँग शुद्ध नेपालीमा सोधेँ–
‪“‎त्रिचक्रचालक‬ महोदय ! नारायणगढ नगरको ‪‎परिभ्रमण‬ गर्दा कति ‪द्रव्यहरू‬ ‪‎व्यय‬ हुनेछन् ?”
रिक्सावालाले भन्यो– नेपाली बोल मुला !!
मैले भनेँ– अवश्य श्रीमान् ! नेपालीमा नै वार्तालाप गर्दैछु ।
रिक्सावाला– पागल बनाएरै छोड्ने भो यसले, सिटमा बस भाइ ! कहाँ जाने हो ??
मैले भनेँ– ‎परिसदन‬ जानू छ । भाद्र र आश्विन महिनाको ‪‎विद्युत–शुल्क‬ प्रदान गर्नु छ ।
रिक्सावालाले सोध्यो– यो परिसदन के हो फेरि ?
छेउमा उभिएका एकजना सज्जनले भनिदिए– बिजुली अफिस जाने रे यो भाइ, लगिदेऊ ।
रिक्सावालाले टाउको कन्याउँदै भन्यो– बस् बाहुन छिटो !!

बाटोमा मैले रिक्सावालालाई सोधेँ– यो नगरीमा कति संख्यामा ‪‎छवि–गृह‬ छन् ?
रिक्सावाला– छवि–गृह मतलब ?
मैले भनेँ– चलचित्र मन्दिर !
उसले भन्यो– यो ठाउँमा धेरै मन्दिर छन् भाइ !
गणेश मन्दिर,
शिव मन्दिर,
लक्ष्मीनारायण मन्दिर,
दुर्गा मन्दिर
अनि ऊ त्यो पछाडिको डाँडामा ‪‎मौलाकाली‬ मन्दिर छ ।
मैले भनेँ– महोदय ! मैले त चलचित्र मन्दिरको विषयमा प्रश्न गर्दै छु, जहाँ नायक–नायिका प्रेमालाप गर्छन् ।
रिक्सावालाले टाउको कन्यायो– यो चलचित्र मन्दिर भनेको के हो फेरि ?

ऊ खै के सोच्दै थियो, यत्तिकैमा उसको रिक्सा अगाडिको गाडीमा गएर ठोकियो । रिक्साको अगाडिको पाङ्ग्रो टेढो भएछ, र हावा खुस्केछ ।
मैले भनेँ– त्रिचक्रचालक ! तिम्रो त्रिचक्रको अग्र चक्र त वक्र भएछ ।
उसले नराम्ररी हप्काउँदै भन्यो– तेरा बाउको खप्पर !
छिटो झर, ग्यारेज नजिकै छ, हावा हाल्नपरो ।
नजिकैको पन्चर टाल्ने ठाउँमा पुगेर मिस्त्रीलाई
मैले विनम्र अनुरोध गरेँ– ‎त्रिचक्रवाहिनी–सुधारक–महोदय‬ !
कृपया, तपाईंको ‪‎वायु–निवेशक–यन्त्रद्वारा‬ म आरोहण गरेको यो त्रिचक्रको अग्र चक्रमा वायुभरण गरिदनुहोस्, धन्यवाद !!
मिस्त्रीले भन्यो– तेरीमा साले ! बिहानैदेखि एक पैसा बोहनी भएको छैन, तँ आउन नपाउँदै शिलोक सुनाउँछस् ???