नेपाली हास्यव्यङ्ग्य अनलाइन पत्रिका

भाडाको ट्याम्पुमा
थोत्रो ढ्वाङ्ग घन्काउँदै आयौ
हात जोडी ङिच्च हाँसी
चुत्थे स्वाँङ झल्काउँदै आयौ
बिकालु कार्यकर्ताको
धोत्रे घोक्रो सुकाउँदै आयौ
घिचेको विकास सबै पचाई
भित्री खोक्रो लुकाउँदै आयौ
मुख देखाई नवीकरण गराई
दुई चार बर्ष भाग्न आयौ
वा नेताज्यू लाज पचाई
फेरि भोट माग्न आयौ ?

भोग तिम्रा मेट्ने बलि
यत्रतत्र देखी आयौ
सपना बाँडी ताण्डब गर्ने
घोषणा पत्र लेखी आयौ
कुकुर फूलको माला लगाई
नभको इज्जत बोकी आयौ
विदेशी भेटघाट सबै सकी
राष्ट्रिय गान ठोकी आयौ
डग्मगिँदै हिँडेको देश
खोल्चा तिरै जाक्न आयौ
वा नेताज्यू लाज पचाई
फेरि भोट माग्न आयौ ?

अस्तीसम्म नचिन्नेले
चिन्दै आज हेर्न आयौ
यत्रो तन्त्र त्यत्रो तन्त्र
भुत्रो तन्त्र फेर्न आयौ
पसिनाको मेरो कमाई
लुटी भुँडी भर्न आयौ
कुटनीतिक पासपोर्ट बेच्ने
व्यापार फेरि गर्न आयौ
भाइ मारेको मुहार तिम्रो
कुर्सीभित्र ढाक्न आयौ
वा नेताज्यू लाज पचाई
फेरि भोट माग्न आयौ ?

चुनाव अर्को नआइकन
तिमीलाई भेट्न पाउने हैन
तिमी पनि हामीलाई सम्झी
फर्की फेरि आउने हैन
त्यसैले क्या नेताहरु
एउटा प्रश्न तिमीलाई गरुँ ?
पुँजीवादले किन यहाँ
हतियार देखाई चन्दा माग्छ ?
कम्युनिष्टको नेताले नी
अरबौँको जेथा राख्छ ?
सिद्धान्तलाई घाममा सुकाई
स्वार्थी सितल ताप्न आयौ
त्यसैले त लाज पचाई
फेरी भोट माग्न आयौ ?