नेपाली हास्यव्यङ्ग्य अनलाइन पत्रिका

जुटायो फुटायो विपक्षी उठायो
जलायो ढलायो र सत्ता चलायो ।
त्यहाँ शान्तिले सास फेर्नै दिँदैनन्
जहाँ ‘राजनेता’ हरू जन्मिँदैनन् ।।

उचाल्छन् पछार्छन् उठाई थचार्छन्
विपक्षीहरू लोभको जाल थाप्छन् ।
हिलोको किलोझैँ सबैतर्फ ढल्छौ
तिमी देश बिर्सेर सत्ता बदल्छौ ।।

चुनावी सभामा बडो शिष्ट हुन्छौ
सधैँ गाउँमै बस्न आकृष्ट हुन्छौ ।
जिते बिर्सने गर्दछौ गाउँलाई
कहाँ गाउँले भेट्दछौ गाउँ आई ?

बडो नम्र भै गाउँमा भोट माग्छौ
विदेशीहरू भेटिए नोट माग्छौ ।
गई गाउँमा आशको दीप बाल्छौ
कमाएर पैसा तला थप्न थाल्छौ ।।

करोडौँ कमायौ उठाएर चन्दा
र सत्ता चलायौ गरी गैरधन्दा ।
गुमाई सबै स्वाभिमानी स्वभाव
गर्यौ देश बन्दी छ तिम्रै रवाफ ।।

जता ऐश पैसा त्यतै ढल्किएछौ
सुरा सुन्दरी पो तिमी पल्किएछौ ।
विदेशी दलाली गरी टिक्न थाल्यौ
कठै ! भ्रष्ट स्वार्थान्ध भै बिक्न थाल्यौ ।।

सुर्खेत