लक्ष्मण गाम्नागेबेइमान कुलमान
यिनको नाम कुलमान । यिनी नेपाल विद्युत् प्राधिकरणका मूलम्यान । {{read_more}}
यिनलाई हालै मोदी माननीयज्यूले लेखा समितिको बैठकमा बेइमान, भ्रष्टाचारी, अटेरी, दम्भी, अनुशासनहीन आदि भनेर सातो लिन खोजे । वास्तवमा उनले ठीकै गरे । यी कुलमान चाहिँदोभन्दा नचाहिँदो काम नै बढी गर्दैछन् । यिनी नेपालको उच्च प्रशासनिक नेतृत्वमा रहेका अधिकारीहरूले गरिआएकाभन्दा भिन्नै र उल्टा काम गरिरहेका छन् । यिनले हाकिमी अनुशासनविरुद्ध काम गरेर अरु अनेक निकायका हाकिम सा’बलाई अप्ठेरोमा पारेका छन् । यिनी आफूले पूरा गर्नुपर्ने काम आफैँ खुरुखुरु गर्छन् । माथिको आदेश पर्खेर बस्दैनन् । यिनी बेइमानै हुन् ।
यिनले नेपाली जनताविरुद्ध पनि घात गरेका छन् । मुलुकलाई मैनबत्ती युगबाट एकाएक बिजुली युगमा ल्याए । इन्भर्टर, सोलार र टर्चलाइटमा खिया लगाएर काम नलाग्ने बनाइदिए । कर्मचारीलाई पनि यिनले बाधा–व्यवधान खडा गरे । बत्ती नभएर कम्प्युटर र मेसिन चलेनन् भनेर सेवाग्राहीलाई टार्ने वहाना बन्द गराइदिए । उद्योग, कलकारखाना चलिरहनुपर्ने बनाइदिएर मजदुर कर्मचारीलाई पनि काममा जोताइदिए । लोडसेडिङमा दिउँसै निद्रा र्पुयाउने कुम्भकर्णको निद्रा यिनले खलबल्याइदिए । धेरैलाई यिनले दुःख थपिदिए । यिनी बदमासै हुन् ।
यिनी मान्छे बेइमान पनि हुन् । लोडसेडिङको अँध्यारोमा मात्रै गरे पनि चारैतिरबाट करोडौँ कमिसन र घुस बटुल्ने ठाउँमा बसेर पनि यिनी कामकै बारेमा सोच्दा रहेछन् । आफ्नो पदको मर्यादा नै भुलेर फिल्डमा आफैँ खटिँदा रहेछन् । फिल्डमा आइलाग्ने अवरोध हटाउन आफैँ पाखुरा सुर्किंदा रहेछन् । दलालसँग साँठगाँठ गरेर सुतीसुती सात पुस्तालाई पोस्न छाडेर तिनीहरूसँग कड्किँदा रहेछन् । विकासविरोधी बिचौलियासँग गोप्य मिटिङ, सिटिङ, इटिङ गर्न छाडेर तिनीहरूसँग परपरै भड्किँदा रहेछन् । काममा बाधा गरेर अनेक अनुचित माग गर्ने बिचौलियाहरूलाई जे–जे माग्छन्, पूरा गरिदिएर थामथुम पार्नुको सट्टा थुनिदिन्छु भनेर तर्साउँदा रहेछन् । माननीय मोदीजीले भनेको सोह्रैआना सही हो । यिनी भ्रष्टै हुन् ।
कर्मचारी भएर पनि यिनी जागिर जाला भन्ने डरै नमानी सुपरपावरसँग पौँठेजोरी खेल्दा रहेछन् । माननीय मोदीज्यूले आफ्नो सुपरपावर प्रयोग गर्दै भ्रष्टाचारीको आरोप लगाउँदा यिनले प्रमाण देखाऊ भनेर सांसदको सुपरपावरलाई च्यालेन्ज गरे । उनले आफ्नै संस्थाको शक्तिशाली युनियनलाई पनि थर्काएको सुनियो । भद्र युनियन परेछ कि क्या हो ! नत्र यिनले कालो मोसो भेट्नुपर्ने हो । ठूल्ठूला दलका नेताहरू, माननीय सांसदका अघिल्तिर भिजेको बिरालोजस्तो भएर पुच्छर लुकाउनुपर्नेमा यिनले सवालजवाफ गर्ने आँट गरे । माननीय मोदीज्यूले चुनाव जितेको बिर्ता क्षेत्रमा उहाँको अनुमति नलिई काम गर्ने कुलमान अटेरी, दम्भी र अनुशासनहीन नै हुन् ।
यस्ता भ्रष्ट, अटेरी, दम्भी, घमन्डी र पदको मर्यादा राख्न नसक्ने प्रशासकलाई सरकारले त्यति ठूलो संस्थाको प्रमुख पदमा नियुक्त गर्नै नहुने हो, गरिहालेको भए पनि सरकार परिवर्तन हुनासाथ घोक्रेठ्याक लगाएर हटाउनुपर्ने हो । भनेको लुरुलुरु मान्ने एउटा लुतुरे हनुमानलाई प्राधिकरण प्रमुख बनाउने मौका नदिएर यिनले सरकारलाई पनि अप्ठेरोमा पारेका छन् ।
तर अब यिनको घमन्ड तोडिन्छजस्तो छ । ढिलै भए पनि मोदीजीहरू कस्सिनुभएको छ, अब यिनी पक्कै ठेगान लाग्लान् । कुलमानजस्ताहरूलाई ठेगान नलगाई मुलुक कसरी भ्रष्टाचारमुक्त होला त !
नेपाल, जेष्ठ १९, २०७६
