नेपाली हास्यव्यङ्ग्य अनलाइन पत्रिका

अमर अधिकारी :

(भाञ्जा मामाघरमा गएपछि)
माइजुः ल भाञ्जाबाबु ! यो करेलाको अचार मीठो भाछ कि छैन चाख्नुस् त।
भाञ्जः माइजु ! यो त तीतो छ। करेला पनि मीठो होला त ?
-१-

(विहेका लागि केटी हेर्न आएर पनि गैसकेपछि)
आमाः आज हरहरी उपाध्याय नाम गरेका केटा आएका थिए आफ्ना बाउसँगै तिम्लाई हेर्न, काँ गएकी ?
छोरीः नाई मम्मी म त यस्ता पुराना नाम गरेका केटासँग त विहे गर्दिनँ !! आयुस, प्रत्युस, निशान्त जस्ता नाम भएका केटा पाइन्नन् र ?
-२-

(प्रहरी एक मिडियामा गएपछि)
प्रहरीः विष सेवनको पनि विज्ञापन गर्ने हो ? कानून पालना गर्नुपर्दैन ? हामीकहाँ उजूरी आएको छ !
मिडिया सञ्चालकः के गर्नु पुलिस दाइ ! देशमा उद्योगहरु डुबिहाले, विज्ञापन पाउनै गाह्रो, हामी बाँच्नै गाह्रो भो ! अनि विष सेवनकै भए पनि विज्ञापन गर्नथालेको, पैसो दिइहाल्छन् क्या रे !
-३-

(सामाजिक संस्थामा पुरस्कृतको नाम छनौट हुँदै गर्दा)
पहिलोः पल्लो गाउँको गुण्डा छ नि, त्यसैलाई पुरस्कृत गरौँ! सुध्रिन्छ कि ?
दोस्रोः बिग्रेकालाई सपार्ने तरिका यो हो नि त ! सप्रेकालाई किन सपार्ने ?
-४-

(नवागन्तुक टोलमा प्रवेश गरेपछि)
आगन्तुकः यो टोलमा भिकारीको घर कुन होला ?
पसलका साहुः यो टोलमा त सबै हुनेखाने नै छन्, को होला र भिकारी ?
आगन्तुकः उहाँको खास नाम भिमकान्त रिमाल हो, मैले त हतार भएर छोटकरीमा भिकारी भनेको।
-५-

०००
खुंग्री, रोल्पा। हालः बुढानिलकण्ठ, काठमाडौँ।