नेपाली हास्यव्यङ्ग्य अनलाइन पत्रिका

यौटा डि भि गतिलो पारौं न देशलाई ।
छिट्टै अमेरिकामा सारौं न देशलाई ।

ओढेर नक्कली खोल बन्नु पर्‍यो नयाँ के ।
वैतरणीदेखि चाँडै तारौं न देशलाई ।

हामी जितेर के भो हार्दैछ देशले नै ।
च्याँखे दिई जुवामा हारौं न देशलाई ।

ताला छ द्वारमा यो चाबी उतैउतै छन् ।
को सक्छ खोल्न आऊ उघारौं न देशलाई ।

सुस्ता मिचिरहेछन् त्यस्तै कति कति छन् ।
कोही नभन्नुहोला बारौं न देशलाई ।

कोही कतार जाऊन् कोही मलेसियमा ।
जन्ता उतै दिई निथारौं न देशलाई ।

बाँझो जमीन छोडी निर्जीव तुल्य पारी ।
केकाम भो र आजै मारौं न देशलाई ।

बम्घा, गुल्मी