तीन फित्कौली मुक्तक
मलाई यो घाम, जून र चन्द्र उस्तै लाग्छ, यी धामी झाँक्री नेताका मन्त्र उस्तै लाग्छ, फेरिँदैन कहिल्यै तिनीहरूका रूप र चरित्र, जुन तन्त्र आए पनि यो यन्त्र उस्तै लाग्छ !
१ मुक्तक
ठेकी त्यही नै हो मदानी पनि त्यही हो
दही मथेर जम्मै घ्यू खानी पनि उही हो
सधैँ जुध्ने र लड्ने त भेडा बाख्राहरू हुन्
भन्नुहोस् घ्यू र तरबार बेच्ने कुन सही हो ?
२ मुक्तक
कोही यहाँ आफ्नै बिचारबाट विचलित भए
उत्कर्षमा नपुग्दै महिषासुरहरू स्खलित भए
कहाँ गए जून तारा टिपेर झारी दिन्छु भन्नेहरू
हेर्नुस् आज तिनै अनुहारहरू कुहिएर गलित भए ।
३ मुक्तक
मलाई यो घाम, जून र चन्द्र उस्तै लाग्छ
यी धामी झाँक्री नेताका मन्त्र उस्तै लाग्छ
फेरिँदैन कहिल्यै तिनीहरूका रूप र चरित्र
जुन तन्त्र आए पनि यो यन्त्र उस्तै लाग्छ !
०००
हेटौँडा-४, मकवानपुर