नेपाली हास्यव्यङ्ग्य अनलाइन पत्रिका

रौतहटमा नेपाली तथा मातृभाषा बज्जिकामा साहित्य सिर्जना गरिरहेका साहित्यकार सञ्जय साह मित्रलाई भारतमा सम्मानित गरिएको छ । बज्जिका दिवसको अवसरमा भारत बिहारको मुजफ्फरपुरमा रहेको तथागत सांस्कृतिक फाउण्डेसन तथा अरुणादित्य ट्रस्टले साहित्यकार मित्रलाई महाकवि अवधेश्वर अरुण सम्मानबाट सम्मानित गरेको हो ।

नेपाली र बज्जिका भाषामा करिब डेढ दर्जन कृति प्रकाशन गरिसकेका साहित्यकार मित्रलाई नेपालमा मधेस प्रदेश र बागमती प्रदेशका दर्जनौँ संघसंस्थाहरूले सम्मानित गरिसकेका छन् ।

नेपालमा बज्जिका भाषाको पहिलो साहित्यकारको रुपमा मित्रलाई बज्जिका पत्रिकाको माध्यमले बज्जिका भाषाको प्रचार प्रसारमा महत्वपूणर् योगदान दिएकाले सम्मानित गरिएको हो । भारतमा सम्मानित हुने मित्र रौतहटका पहिलो साहित्यकार पनि हुन् ।

मित्रसँगै दुई भारतीय साहित्यकारलाई पनि सम्मानित गरिएको छ । हिन्दी तथा बज्जिका भाषाका साहित्यकारद्वय डा. विद्या चौधरी र अखौरी चन्द्रशेखरलाई पनि सम्मानित गरिएको छ ।

विशिष्ट अन्वेशक तथा समालोचक डा. रामेश्वर प्रसादको अध्यक्षता तथा बज्जिकाञ्चल विकास पार्टीका राष्ट्रिय अध्यक्ष देवेन्द्र राकेशको प्रमुख आतिथ्य रहेको थियो ।

कार्यक्रममा वयोवृद्ध साहित्यकार प्रा.डा. (डि.लिट्.) अवधेश्वर अरुणको पनि सहभागिता रहेको थियो । प्रा.डा. अरुणको जन्म दिवसको अवसरमा भारतमा १४ अक्टुबरलाई बज्जिका दिवसको रुपमा मनाइन थालिएको छ ।

कार्यक्रममा बिहारका विभिन्न जिल्लाका साथै नेपालको सर्लाही र रौतहटका साहित्यकारहरूको सहभागिता रहेको थियो ।

फित्कौली डटकममा नियमित हास्यव्यङ्ग्य लेखनमा सक्रिय सञ्जय साह मित्रलाई फित्कौलीको पनि हार्दिक बधाई ।

०००