नेपाली हास्यव्यङ्ग्य अनलाइन पत्रिका

साह्रै जीर्ण भयो तथापि बलले चल्दैछ यो देह जो
ऊर्जा जाग्दछ हो विचित्र मनमा बोकूँ पहाडै म यो
थाक्ने मात्र शरीर हुन्छ जनको थाक्दैन कैल्यै मन
खाएको खलि नै विशुद्ध सुन हो साँचै बुढ्यौलीपन ।१

यो नेपाल दिगो विकाश नहुँदा खट्केर धेरै कुरा
पारौँ देश अझै समुन्नत भनी चल्छन् दुवै पाखुरा
मान्छे वृद्ध तथापि हो प्रगतिमा इच्छाहुने लम्कन
खाएको खलि नै विशुद्ध सुन हो साँचै बुढ्यौलीपन ।२

लाखौँ सिर्जनमा अमूल्य गहना नेपाल मेरो न हो ?
मान्छेभित्र खुदा रही सुख दुखै भोग्ने उसैले त हो
सारा स्वर्ग यही छ भोग्नु सबले साँचेर यो जीवन
खाएको खलि नै विशुद्ध सुन हो साँचै बुढ्यौलीपन ।३

धोको हुन्छ पिऊँ पिऊँ मनभरी सञ्जीवनी नै सुरा
इच्छा जाग्छ अजम्मरी हुनगई लाखौँ चढूँ टाकुरा
नाचौँ लाग्दछ हो बगान बिचमा भै राधिका मोहन
खाएको खलि नै विशुद्ध सुन हो साँचै बुढ्यौलीपन ।४

हाम्रा नीति र शास्त्रका सब कुरा भुल्दैगए मानव
मान्छेभित्र यहाँ पसेर लफडा गर्दैछ हो दानव
बिग्रे धेर युवा किशोर युवती बाला पनि यो क्षण
खाएको खलि नै विशुद्ध सुन हो साँचै बुढ्यौलीपन ।५

धेरै काम भए यहाँ विगतमा घोटेर ज्यादा घुँडा
राख्यौँ देश अखण्ड बाहुबलले बोकेर भाला खुँडा
पुग्ने चाह अझै छ उच्चगिरिमा फार्दै कडा उल्झन
खाएको खलि नै विशुद्ध सुन हो साँचै बुढ्यौलीपन ।६

०००