नेपाली हास्यव्यङ्ग्य अनलाइन पत्रिका

बुढ्यौली कुनै रोग यो हैन भाइ
नबन्ने बुढो मानिसै छैन काहीँ
जहाँ हुन्छ आरोग्यको हाई-हाई
उहाँ पुग्छ आफैँ बुढ्यौली रमाई ।।१

जिए मिल्छ मौका धराधाम हेर्ने
लिँदै मेजमानी मिठो स्वाद फेर्ने
महत् प्रेमले बन्धु आफन्त बेर्ने
अहा ! तातले नातले साथ घेर्ने ।।२

हिँडेरै जता यष्टि टेकेर मैले
गरेकोछु चल्ती र फिर्ती मजैले
लिएकोछु स्वर्गीय आनन्द ऐले
गरे हुन्छ यो तथ्य चर्चा सबैले ।।३

सबै वृद्ध हुन् लोकका उच्च मल्लो
नहोस् वृद्धका मानमा लेश खल्लो
नहुन् क्वै कुनामा बसी एकडल्लो
नठानुन् कसैले कुनै वृद्ध झल्लो ।।४

सबै रीत आफ्ना बचाएर राख्ने
उचाल्दै गृहस्थी सुसंस्कार ढाक्ने
बुढाबाट नै हुन्छ सो काम हाँक्ने
दिने बुद्धि अर्ती दयाले नथाक्ने ।।५

कयौँ वृद्ध छन् युद्ध जारी गरेका
महान् देशको शान आफैँ भरेका
ती हुन् पौरखी वीर हाम्रा दरेका
नहुन् वृद्ध कोही दशामा परेका ।।६

०००
चाँगुनारायण न.पा.३, भक्तपुर