नेपाली हास्यव्यङ्ग्य अनलाइन पत्रिका

हेर्दैनन् अब नातिका नयनले पाका बनेका तन !
भस्मीभूत भए सयौँ युवकका पाश्चात्यगामी मन !!
देख्छन् दूरदराज मात्र सपना अग्लो हवेली चढी !
श्रद्धा गर्न विशेष पाइन तथा चाहिन्छ ऊर्जा बढी !!६६!!

वृद्धावृद्ध सुषुप्त छन् कहरमा रोगी भएका तन !
छन् सन्तान उता सदा रहरमा खोजेर साजी धन !!
के नै प्राप्त भयो सकेर ढुकुटी विज्ञान नौलो पढी ?
श्रद्धा गर्न विशेष पाइन तथा चाहिन्छ ऊर्जा बढी !!६७!!

यो देवालयझैँ सदा मन छुने लाग्थ्यो पुरानो घर !
पस्दाभित्र डराउने छ अहिले आभा हरायो पर !!
छोरा नाति पनाति बाहिर हुँदा भत्क्यो पुरानो गढी !!
श्रद्धा गर्न विशेष पाइन तथा चाहिन्छ ऊर्जा बढी !!६८!!

छायाझैँ परदेश कुड्मल भयो स्वर्लोक यो कण्टक !!
घुस्रिन्छन् घरभित्र मूषक सयौँ आफ्नो जमाई हक !
सारा खाग भए थिए रहरिला आशा भएका डढी !!
श्रद्धा गर्न विशेष पाइन तथा चाहिन्छ ऊर्जा बढी !!६९!!

पुग्दा वर्ष असी गुमे सब दसी के नै लगाऊँ कसी !
सुन्लान् खै कसले कुरा हृदयका आएर साथै बसी !!
उम्दा कार्य गरी वयस्क सकियो को गर्छ लेखापढी ?
श्रद्धा गर्न विशेष पाइन तथा चाहिन्छ ऊर्जा बढी !!७०!!
क्रमशः

०००
२०८०/१/३
ताप्लेजुङ, हाल- काठमाडौं