नेपाली हास्यव्यङ्ग्य अनलाइन पत्रिका

कविराज घिमिरे :

सासूहरूका पनि छन् नि छोरी
त्यस्तै बुहारी किन हुन्न फेरि
पारेर हेला म स्वयम् बुहारी
रुँदै बसेकी छु बिनाछहारी ।। १

श्रीमान् गएका कति भो विदेश
पैसा पठायौ न त हात लाग्छ
फाटेर चोली फरिया समेत
छ लाज भित्री तहमा बिचेत ।। २

बोलिन्छ म्यासेन्जरमा तथापि
देखे भने पाइनसक्छ सास्ती
काट्छन् बुझी लाइन टेलिफोन
छ चाल यस्तो किन तुच्छ लौ न ।। ३

छोरा न छोरी न त दाजुभाइ
कस्को म हेरूँ मुख बाँच्नलाई
विदेश श्रीमान् ससुरा समेत
सोझा परेछन् अब भन्नु के छ ? ४

स्वामीबिनाको घर मान्नुपर्ने
अनेक पीडा पनि धान्नुपर्ने
अभाव मात्रै हक हो भने ता
पाउन् कसैले हकको सुविस्ता ।। ५

किताब जोगिन्छ जहाँ छ गाता
म खोल्छु आफ्नो अनि बैङ्क खाता
सिधै पठाऊ अब माग्छु पैसा
यस्तो गराएँ मनभित्र पैदा ।। ६

पैसाबिनाको कति काम छैन
दैनन्दिनी खर्च नभै हुँदैन
बुढाबुढी छन् तर लोभ गर्छन्
खाँचो स्वयम् टर्छ भनेर भन्छन् ।। ७

छोडेर पत्नी नपुगुन् विदेश
अभाव टारुन् सँगमा बसेर
खुसी हुने छन् परिवार आफ्ना
बाधा रहन्नन् मनभित्र आफ्ना ।। ८

यो जिन्दगी हो नबनोस् खडेरी
र वेदनामा नपरोस् घडेरी
जे दुःख हुन्छन् सँगमा रहेर
बस्ता सबैको हित हुन्छ हेर ।। ९

नसम्झ पत्नी सबथोक मान्छे
गोता अनेकौँ जति हुन् सहन्छे
पैसा ठुलो हो अथवा इमान
आमाबुबाझैँ म प्रिया हुँ जान ।। १०

०००
भक्तपुर