नेपाली हास्यव्यङ्ग्य अनलाइन पत्रिका

कविराज घिमिरे :

ख्वाएथे यिनले बुता बल सबै हुर्काउँदा जीवन
भुल्छौँ हाल नजानिदो किन यहाँ पारेर झुत्रो मन
हाम्रा तागत यी थिए सकलका मिल्थ्यो सधैँ सादर
एकै वाक्य म भन्छु वृद्धजनको गर्ने गरौँ आदर ।। १

डिग्री छैन पढाइको अनुभवी बन्छन् ठुला साधक
यात्री मात्र बुझौँ सबै जन अरू हुन् वृद्ध यी चालक
काँचा ती फलमा मिठास नहुँदा पाका बने अत्तर
एकै वाक्य म भन्छु वृद्धजनको गर्ने गरौँ आदर ।। २

लाग्दा घाम सयेँल राख्न सकियोस् वर्षा हुँदा गेहमा
राम्रो धोइपखाल हेर यिनका मैला हुँदा देहमा
प्यासिन्छन् अनि भोकले छटपटी होलान् बनौँ सारद
एकै वाक्य म भन्छु वृद्धजनको गर्ने गरौँ आदर ।। ३

घोच्ता हुन् कति च्वास्स च्वास्स मुटुमा बोल्दा रुखा बातले
बोलौँ सुन्दर भाव अर्पण गरी बिग्रिन्छ अज्ञानले
यी हुन् स्वच्छ हिमालझैँ धरहरा संसार पार्छन् वर
एकै वाक्य म भन्छु वृद्धजनको गर्ने गरौँ आदर ।। ४

आमा बाबु फुपू झनै हजुरबा ऐश्वर्य हुन् अन्य यी
हाम्रो जीवन बाँच्न निम्ति त्रिफला जस्तै बने औषधी
यस्ता यी गुणवान् समग्र दिलका हुन् साँच्चि नै सुन्दर
एकै वाक्य म भन्छु वृद्धजनको गर्ने गरौँ आदर ।। ५

०००
भक्तपुर
(भबुसास अभ्यास)