नेपाली हास्यव्यङ्ग्य अनलाइन पत्रिका

कविराज घिमिरे :

अन्याय अन्त्य गर्दै सत्कर्मनिम्ति लड्छन्
छन् जून घामजस्ता आलस्य त्याग भन्छन्
जित्ने कला छ काफी बाँचे सधैँ नहारी
हुन् वृद्ध श्रेष्ठ हाम्रा आदर्शका छहारी ।। १

यी ज्ञानका घडा हुन् नासेर नासिँदैनन्
जल्ले पिए सिनित्तै अज्ञान झाङ्गिँदैनन्
सद्भाव छर्नसक्ने उम्दा परोपकारी
हुन् वृद्ध श्रेष्ठ हाम्रा आदर्शका छहारी ।। २

इच्छा सदैव लिन्छन् सन्तान उच्च पार्न
कालो पखाल्न जुट्छन् बाधा स्वयम् निखार्न
ऊर्जा बनेर आफू भर्छन् सयौँ भकारी
हुन् वृद्ध श्रेष्ठ हाम्रा आदर्शका छहारी ।। ३

पूरै ढलेर थाम्छन् आवास हुन् निदाल
जस्तै परोस् बिचल्ली बन्छन् अझै निहाल
कोही बिगार्न आए भन्छन् बनौँ पुजारी
हुन् वृद्ध श्रेष्ठ हाम्रा आदर्शका छहारी ।। ४

थाकेर थाक्नलाई मान्दैन स्वाभिमान
दिन्छन् सदैव शिक्षा गर्छन् खुदै कमान
सिद्धान्तकार विद्वान् कर्तव्य बोधकारी
हुन् वृद्ध श्रेष्ठ हाम्रा आदर्शका छहारी ।। ५

०००
भक्तपुर बुढ्यौली साहित्य समाजकाे छन्द अभ्यास