कविराज घिमिरेवृद्धका कर्म फेर्न !
दिनदिन हुन थाल्यो देशमा भोक शोक असल जति भगाई भ्रष्टको हुन्छ खोज मति जब धमिलोझैँ हुन्छ नेपाल हेर्न युवक अनुज थाले वृद्धका कर्म फेर्न ।।
कविराज घिमिरे :
सुझबुझ नगरी जो वृद्धले गर्छ काम
असहज हुन थाल्छन् लोकमा ती तमाम
सबतिर छ निराशा काल यो ठिक्क पार्न
युवक अनुज थाले, वृद्धका कर्म फेर्न ।। १
छलकपट हुनाले देशमा चैन छैन
अमनचयन राख्ने कत्ति सुर्ता हुँदैन
गर गर युवती हो क्रान्ति मैलो सुधार्न
युवक अनुज थाले, वृद्धका कर्म फेर्न ।। २
युवक र युवतीका वक्षमा छन् निराशा
परमुलुक हुँदै छन् देशमा छैन आशा
अब कति चुप लाग्ने पर्छ आएर केर्न
युवक अनुज थाले, वृद्धका कर्म फेर्न ।। ३
परपर सब पार्छन् बोल्छ जो सत्यमात्र
निजपरक बने झन् वृद्धका यी चरित्र
उकुसमुकुस पार्ने छन् जहाँ ती लतार्न
युवक अनुज थाले, वृद्धका कर्म फेर्न ।। ४
धन धन धन भन्दै डुब्न थाले धनैमा
महल सुन थुपार्ने होड लाए मनैमा
अति जब हुन थाल्यो सोच जागी हसुर्न
युवक अनुज थाले वृद्धका कर्म फेर्न ।। ५
दिनदिन हुन थाल्यो देशमा भोक शोक
असल जति भगाई भ्रष्टको हुन्छ खोज
मति जब धमिलोझैँ हुन्छ नेपाल हेर्न
युवक अनुज थाले वृद्धका कर्म फेर्न ।। ६
०००
भक्तपुर
Subscribe
Login
0 Comments
Oldest
