दुष्यन्त भट्टराईसन्तान आफ्ना बिग्रिँदा
आमा बुवाको चाहना सन्तानको होस् उन्नति चिन्ता हुने हो हर्दमै देख्दा यिनैको दुर्गति देखिन्न हाँसो ओठमा आँखा अकस्मात् बर्सिँदा आनन्द बस्ला को यहाँ सन्तान आफ्ना बिग्रिँदा ।
दुष्यन्त भट्टराई :
सन्तानका लीला सबै आमा बुवाका हुन् धन
क्रीडा यिनैका देखिँदा आनन्द मान्ने जीवन
बाँच्छौँ यिनैका निम्तिमा पीडा सहन्छौँ हर्दम
बिग्रे भने मर्छौँ स्वयं मर्नेछ बाँच्ने चाहना ।१
यो काख नै मैदान हो सन्तानले खेले यहीँ
छाती स्वयं भन्डार हो खाए यही हुर्के यहीँ
हुन् अंश हाम्रा जिन्दगीका वंश थाम्ने छन् यिनै
बिग्रे भने नासिन्छ जो सर्वश्व हाम्रो जीवनी ।२
शिक्षा भनेको मार्ग हो हिँड्ने त्यसैमा जिन्दगी
इच्छा भनेको एउटा लाने सुबाटो सारथि
सम्पूर्ण शिक्षा पाउँदा मात्रै हुने हो उन्नत
बाटो नराम्रो हिँड्छ जो गन्तव्यमा ऊ पुग्छ त ?।३
सत्मार्ग नै देखाउँछौँ आमा बुवा सन्तानमा
संस्कार नै सम्झाउँछौँ आमा बुवा सन्तानमा
सन्तान आफ्ना सप्रियून् भन्ने सदिच्छा हुन्न के ?
सन्तान आफ्ना बिग्रिए आत्मा बुवाको रुन्न के ? ।४
आमा बुवाको चाहना सन्तानको होस् उन्नति
चिन्ता हुने हो हर्दमै देख्दा यिनैको दुर्गति
देखिन्न हाँसो ओठमा आँखा अकस्मात् बर्सिँदा
आनन्द बस्ला को यहाँ सन्तान आफ्ना बिग्रिँदा ।५
०००
बेलायत
Subscribe
Login
0 Comments
Oldest
