नेपाली हास्यव्यङ्ग्य अनलाइन पत्रिका

कविराज घिमिरे :

कुकर्म छन् कतै भने बढार्न गर्छ मद्दत
सुयोग्य पार्न वंशको अनन्तसम्म खट्तछ
पिता अचेत होस् तथा परे त नीदमा अति
सदैव गर्छ कामना बनुन् भनेर सन्तति ।।१

प्रबुद्ध पार्न लम्किने अनेक ताडना खपी
पछार्न तम्सिने सधैँ हरेर दीन दु:ख ती
पिता मुहान हुन् अहा ! गरा धरा भिजाउने
कतै अशिष्ट छन् भने कुदेर झन् रिझाउने ।।२

पिता अमूक हुन् उनै विशिष्ट बन्नसक्तछन्
सुधीर चालका धनी पिता युगान्त चल्दछन्
प्रसाद शुद्ध फूल हुन् रहुन् सदैव माथमा
सुमार्गमा हिँडाउँछन् बसुन् सदैव साथमा ।।३

पिता हुंँदैन मृत्युको सिकार जो अभेद्य छ
रहन्छ प्राण कीर्तिमा शरीर ढल्न सक्तछ
पिता समान विश्वमा मिलेन खै सुशासक
सबै छ गौण साँच्चिकै पिता बुझौँ उपार्जक ।।४

हराभरा बनाउने समस्त हुन् सुचालक
बनिन्छ वृद्ध प्रौढ वा युवा भएर बालक
पिता विवेकका धनी पिता त फूल बाबरी
पुकार गर्छु यो सधैँ पिता बनुन् अजम्बरी ।।५

०००
भक्तपुर