नेपाली हास्यव्यङ्ग्य अनलाइन पत्रिका

घनश्याम रेग्मी :

जुटायो भावीले साथमा बाँच भन्दै
सँगै बोक्छन् भारी काँधमा काँध थाप्दै
उकालोका साथी ओर्लिँदामा सँगै झन्
मिलेका साथी झैँ वृद्धवृद्धा सँगै छन् ।।१

पिए पानी साथै भोक तिर्खा हुँदामा
पुछेका साथीका आँसु धारा रुँदामा
युगौँ बित्ला हामी छुट्टिदैनौँ नि भन्छन्
मिलेका साथी झैँ वृद्धवृद्धा सँगै छन् ।।२

निकै आए बाधा विघ्न धक्का दिने ती
कुरा काट्ने कैयौं व्यक्ति वैरी छिमेकी
सवारी पाङ्ग्रा हुन् साथसाथै रहन्छन्
चखेवा जोडी झैँ वृद्धवृद्धा सँगै छन् ।।३

छ लामो यो यात्रा जिन्दगीको असाध्य
दिएका साथीको साथ साझा छ लक्ष्य
न नाफा घाटाको व्याज चिन्ता लिँदैनन्
परेवा जोडी झैँ वृद्धवृद्धा सँगै छन् ।।४

कहाँ हो साथीको जन्म अर्को कहाँको
हिँडौँला घुम्तीमा साथ बाचा जहाँको
छुटे धेरै यात्री भोलि को भेटिने हुन्
मिलेका साथी झैँ वृद्धवृद्धा सँगै छन् ।।५

०००
समी चोक, भरतपुर ५, चितवन