नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे”:

धर्म उत्तम रहोस् गृहस्थको
बास सुन्दर सगोल मस्तको
जिन्दगी अब बनोस् सुधामय
वृद्ध आश्रम बनून् शिवालय॥१॥

वृद्ध हुन् जतिसुकै बुवा मुमा
ठान्नुपर्छ शिव वा सती उमा
वृद्धमाथि नरहोस् दुराशय
वृद्ध आश्रम बनून् शिवालय॥२॥

चित्त व्याकुल बनी गए पनि
पुत्र ल्याउन खटून् रथी बनी
फर्कियून् सब जना स्वआलय
वृद्ध आश्रम बनून् शिवालय॥३॥

छन् जहाँ र जसरी सुसन्तति
प्रेम पोषण गरी सधैँ अति
राख्न वृद्ध घरमा गरून् तय
वृद्ध आश्रम बनून् शिवालय॥४॥

वृद्ध आश्रम लगी स्वयम् उता
दूरदेश दगुरे बधू पुता
रित्तिने घर भयो ठुलो भय
वृद्ध आश्रम बनून् शिवालय॥५॥

मृत्युको पछि दिएर मिल्छ के ?
पाउने छ कसले र निल्छ के?
देह जीवित छँदै दिऊन् पय
वृद्ध आश्रम बनून् शिवालय॥६॥

०००
भक्तपुर