नेपाली हास्यव्यङ्ग्य अनलाइन पत्रिका

कस्तो अनौठो है ! यो पैसो भन्ने चिज क्या ! मलाई मात्र चाहिने भन्या ! मैले सापटी नतिरे पनि अरुकोमा त रुख छ त्यो पनि रातारात पलाउने ! कति टिपिरहन मिल्ने होला ! तैपनि उसैलाई खाँचो रे !

सामान्यतः रुख पलाउन र पात फेरिन छ महिना लाग्छ तर पैसाको रुख, पैसावालाको रूख त एक रातमै झ्वाम्म हुने हैन र ?! उसले टिप्दै बाँड्दै गरे हुने नि । बरु एउटै मान्छेलाई दोहोर्‍याएर नदिने भए अर्को पटक माग्न श्रीमती, छोरा क्रमशः पठाउँथे नि ! ती पलाका पात टिप्न पनि … नदिने दाउ होला क्या पात नटिप्ने !

हिजो एक जना भन्दै थियो सहृदयी ठानेर सापटी दिनेले खपेको छट्पटी सम्झी न ! त्यो सापटी दिनेको ठाउँमा बसेर म नतिर्नेले किन सोचविचार गर्ने ? फोकटिया ! उसलाई पैसा खाँचै छैन । खाँचो त मलाई हो । घरव्यवहार चलाउन कम्ता गाह्रो छ मलाई ! छोराछोरीको बिहादान गर्नुपर्‍यो, श्रीमतीको रहर कति छ ? बेलाबखत साथीभाइ भेट फेरि व्यवसाय बढाउनुछ, बैंकमा पनि त अलिकति रहनुपर्छ । कस्तो कुरै बुझ्दैन भन्या । अस्तिनै सापटी दिएँ भनेर मागिरहन्छ भन्या ! एक पटक दिएको सापटी जाबो कतिचोटि मागिसक्यो त्यै पनि छाड्दैन । २/४ चोटि मागेपछि त छाडिदिनु नि कत्ति झ्याउ नलाग्या होला ! हुँदा हुँदा घरमै आउने , बाटोघाटोमा पछ्याइरहन्छ बा !! अब त प्रहरीकहाँ जान्छु, कानुनी प्रक्रिया अपनाउँछु भन्छ कस्तो जिराहा है मोरो !

उसले मलाई चिनेकै रहेनछ । म कहाँ सापटी तिर्ने मान्छे हो र उसलाई तिर्ने ! प्रहरीले पनि सम्झाईबुझाई ती भन्छ म हुन्छ भन्छु। २/४ वर्ष यताउता परिहाल्छ तैपनि छाडेन भने व्याज सकिन साँवा मात्र तिर्छु भनेर उम्कन्छु नि ! म पनि कित समय राजनीति गरेर जालझेलमा विशेष योग्यता हासिल गर्‍या मान्छे हो नि ! यति नजानेकाले सापटी लिन सक्छ ? सापटी फुत्काउन पनि त कति अनुनय विनय गर्नुपर्छ नि ! के थाहा नभा तिकडम हो र ? अनि, अनि त त्यो साँवाभन्दा व्याजप्रेमीसित भन्दा मसँग दाउपेच कम छन् भन्ठान्या ? सजिलोसँग भन्या भन्या बेलाँ तिर्नलाई ? भैगाे चुप लाग !

०००
पर्वत, हाल काठमाडौं