नेपाली हास्यव्यङ्ग्य अनलाइन पत्रिका

सुरेशकुमार पाण्डे :

“सर अहिलेको अबस्थामा देश कसरी बन्छ ?”- खुसिरामले कपुर सिंहलाई सोध्यो।
आज सबै राजनैतिक पार्टीहरूका पत्रकारले अन्तर्वार्ता लिँदै छन्। एउटै मञ्चमा प्रमुख तीन दलहरू जुटाएका छन्।

“धेरै राम्रो प्रश्न उठाउनु भयो। अहिले समग्रहमा भन्नुपर्दा देशको अवस्था दयनिय छ । अहिलेसम्मकै तरल अवस्थामा छ। यसो हुनु स्थाई सरकार नभएर हो। त्यसैले अहिलेको निर्वाचनमा हाम्रो पार्टीलाई सम्पष्ट बहुमत दिनुपर्छ।”- कपुरसिंहले आफ्नो बिचार राख्यो।

“देवेन्दर सर ! हजुरको बिचारमा के गर्नुपर्ला ?”- पत्रकारले उहि बिचार अर्को पार्टी प्रमुखलाई सोधे।
“कपुरसिंहको पार्टी आयो भने देश कङ्गाल हुन्छ। अहिलेको अवस्थामा जनताले पूर्ण बहुमतको सरकार बनाउने मौका हाम्रो पार्टीलाई दिनुपर्छ। हामीले मात्र देशको विकास गर्नसक्छौँ र स्थाई सरकार प्रदान गर्न सक्छौँ।

“हजुरको दृष्टिमा अहिलेको अवस्थामा के गर्नुपर्ला ?”- पत्रकारले पवनकुमारलाई सोधे।
“प्रष्टै छ अहिलेको अवस्थामा जनताले यहाँहरूको पार्टीको सरकारबाट निकास चाहेका छन्। देशको विकासका लागि अहिले हाम्रो पार्टीलाई पूर्ण बहुमत दिनुपर्छ।”-पवनकुमारले पनि आफ्नो बिचार राख्यो।

“जनताले फेरि पनि कसैलाई बहुमत दिएनन् भने के गर्नुपर्ला ?”- त्यस्तो अवस्था परिआए कुनै पनि राम्रो दलसँग मिलेर सरकार चलाउँछौँ ?”- कपुरसिंहले भने।

“चुनाव लड्दा एउटाले अर्कालाई भ्रष्टाचारी भन्ने अनि बहुमत पुराउन उनैको बिचमा एकता गर्ने यो कस्तो नीति हो ?”-पत्रकारले सोध्यो।
“कहिलेकाँही हामीले सत्ताको लागि होइन देशको लागि गणतन्त्रको रक्षाको लागि दुश्मन शक्तिसँग पनि एकता गरेर जानुपर्ने हुन्छ।

“यसको अर्थ हजुरहरू तीनव़टा दल बाहेक अरूले देशको र गणतन्त्रको रक्षा गर्न सक्दैनन् ? जसरी भए पनि हजुर तीनौटा दलहरूको सरकार हुनै पर्यो ?”-पत्रकारले व्याङ्ग्यात्मक शैलीमा सोधे।

“हो, देशको अवस्था अनुसार हामीले आलोचनात्मक एकता गरेर जानुपर्छ।”-पवनकुमारले भने।
“सर देशको अवस्था नभनेर यसलाई पार्टीको अवस्था भन्न मिल्लैन ?”- पत्रकारले तीनौटैको मुखमा हेर्दै व्यङ्यात्मक प्रश्न गरे ।

०००
घोराही- १८, दाङ