नेपाली हास्यव्यङ्ग्य अनलाइन पत्रिका

धोस्त नै हो मेरो नाम
धोस्त नै हो मेरो काम
मलाई ध्वस्त नै मन पर्छ
धोस्तैमा यो मन अड्छ ।

म त
शान्तिलाई पड्काउँदै
क्रान्तिलाई लड्काउँछु
सहमतिलाई अडकाउँदै
सहकार्यलाई भड्काउँछु
गाउ“ शहर ध्वस्त पार्नु छ
सडक सदन अस्तब्यस्त पार्नुछ
किनभने
मलाई ध्वस्त नै खान मन छ
मलाई ध्वस्तमै जान मन छ ।

कलाकारखाना गरी बन्द
शिÔालाई पारी मन्द
व्यवसायमा हाली दुर्गन्ध
देशको अर्थतन्त्रलाई ध्वस्त पार्नुछ
धनीलाई गरीब,
गरीबलाई
झन गरीबको रेखामुनि झार्नु छ
किनभने
ध्वस्त हो मेरो विजय
ध्वस्त हो मेरो आशय
भोकोलाई भोकै राखेर
नाङ्गोलाई नाङगै पारेर
सात सालदेखि अहिलेसम्म
ध्वस्तमै भो मेरो जित
ध्वस्तमै भो मेरो हित ।

कहिले क्रान्तिको आगो बालेर
धनीलाई झिरमा उन्छु
कहिले शान्तिको धागो हालेर
गरिबलाई झुठो सपना दिन्छु
ध्वस्तैमा रमाउदै
ध्वस्तैमा कमाउदै
ध्वस्तैमा देखेको छु मेरो हित
त्यसैले
ध्वस्त नै हो मेरो गीत
ध्वस्त नै हो मेरो रित ।

बोल्छु मुखमा राम राम
छुराले पार्छु काम तमाम
भन्छु अरुलाई तथानाम
कमाउँछु आफू टन्न दाम
तर पार्छु देशलाई जाम
किनभने
ध्वस्त नै मेरो नाम
ध्वस्त नै मेरो काम ।

०००
घट्टेकुलो, काठमाडौं