नेपाली हास्यव्यङ्ग्य अनलाइन पत्रिका

भैँसीले मुरली बजाउँछ यहाँ राँगो उठी नाच्दछ
यो देखी घरको सुशील महँगी खित्का दिई हाँस्दछ
लड्छन् नित्य उता वृथा सडकमा बाच्छा र बाच्छी जब
साँढे मस्त रमाउँछन् चउरमा गर्दै खुबै उत्सव ।

पाक्छन् व्यञ्जन मिष्ठ हेर बुकुरा खाई रमाए कति
भोग्दैछन् अनिकाल यी महलले कस्तो छ यो दुर्गति
किन्छन् औषधि ती अकिञ्चनहरू पर्दा बिरामी सधैँ
कन्चो नै नहुँदा भकाभक यहीँ मर्छन् धनी ती सबै ।

रोई गोरस जान्छ घुम्न हटिया छल्की छचल्की पल
भित्रिन्छन् घरमा प्रमत्त मनले हाँसेर गङ्गा जल
बिक्दैनन् किन पाल्नु हाँस कुखुरा पालेर के हुन्छ र ?
बिक्छन् पारि युवा र मस्त युवती व्यापार यो हुन्न र ?

ठूला छन् गजराज हेर उँट यी पढ्दै नपढ्दा पनि
पाए किन्न प्रमाणपत्र अब को पढ्ला र आँधो बनी ?
उल्टो घुम्छ घडी सधैँ समयको रुन्छन् बकुल्ला दुखी
मौरीको अब काम छैन घरमा पालौँ अरिङ्गाल कि ?

रोप्छौँ झ्याउ र फल्दछन् तर मिठा ती आँप या अङ्गुर
छोड्छन् सन्त अनार मौसमहरू खान्छन् खसी बङ्गुर
पानीभित्र बलेर अग्नि जहिले माछा त्यसै मर्दछन्
मट्टी तेल डिजेल बल्न नसकी हा ! आँसु ती झार्दछन् ।

दमक- ८, झापा
९८६३६२२६११
इमेल : mukdarsak@gmail.com