नेपाली हास्यव्यङ्ग्य अनलाइन पत्रिका

लौरो आस बनेर आज उभियो त्यो राजधानीतिर
अस्ताए रवि साँझ झैँ रुखहरू मुर्छा परे आखिर
भुत्ते देख्छु हलो मसी कलमको सुक्तै गएको छ झैँ
आशा खोज्दछ आज हेर जनता टेकेर लौरो सिधै !!

लौरो केवल चिह्नमात्र नबुझौँ आक्रोश हो भित्रको
लौरो चिह्न छ भिन्न मात्र नबुझौँ यो शक्ति विद्रोहको
लौरो भोलि खडा बनेर तगडा रक्षा गरोस् लोकको
लौरो साथ रहोस्- न शासक बनोस् निर्मूल होस् भोकको !!

लौरो चित्र विचित्र हो समयको सम्भावनाको घर
लौरो मित्र निमित्त वृद्ध जनको सद्भावनाको भर
लौरो अस्त्र बनेर भ्रष्टजनमा आतङ्क मच्चाइदे
हे लौरो अब देशभित्र सुखको आभास फर्काइदे !!

यात्रामा कति आउलान् अजबका जङ्घार खोलाभरि
यात्रीले कति पाउलान् गजबका सङ्कष्ट नानाथरि
लौराले अब बन्नु पर्छ चतुरो टेकोस् बिचारी स्थल
लौराको भयबाट भ्रष्ट डरले पुग्ने बनून् जङ्गल !!

लौराको गुणगान धेर नगरून् दानीहरूले पनि
लौराको अपमान धेर नगरून् ज्ञानीहरूले पनि
लौरो साथ लिई हिँडून् युवकले आमा बुबा खातिर
लौरोको महिमा बुझोस् समयले होस् सम्झना आखिर !!

मेचीनगर, झापा
हाल अमेरिका