नेपाली हास्यव्यङ्ग्य अनलाइन पत्रिका

तीन जना ठूला विद्वानहरू एउटै डुँगामा चढेछन् । संयोगले समय चाहिँ चुनाव आउनै लागेको रहेछ । पहिलो ठूला विद्वानले बाँकी दुई जनासँग यस पटकका चुनाउका सम्बन्धमा ग्रह गोचर हेरे र कसको जित हुन्छ भन्ने आफ्नो धारणा बताए । दुई विद्वानले उनको कुरो बुझेनन् अरगज्ज मात्रै परे । नबोली बस्ता मूर्ख भइन्छ भन्ने नेपाली बानीले गर्दा दोस्रो ठूलो विद्वानले आफ्नै विषयको बसाइँ सराईका आधारमा विश्लेषण गरे, फरक उम्मेदवारले जित्ने नतिजा निकाले ।

तेस्रो विद्वानले पनि विद्वत्ता प्रयोग गर्नै पर्यो भनेर बजार भाउ विश्लेषण गर्दै त्यसै आधारमा विजेता पनि तेस्रो निकाले । एकमत भए त कुरै सकिएको, फरक मत देखिनु त्यो पनि चुनाव आउन लागेका बेलाका नेपाली किन छोड्थे ? बहस चर्किँदै गयो । नौका तार्ने बिचरो पहिले त रमाइलो मान्दै थियो, पछि कुरै बुझ्न छोड्यो र दिक्क भयो । तर पनि ध्यान दिएर सुन्दै छ ।

पहिलो विद्वानले कुर्लिएर सोधे “तपाईंहरूलाई शनि सङ्कटाको गति थाहा छ ?” दुवैले छैन भन्ने जवाफ दिए । “त्यसो भए तपाईंहरूको एक चौथाई जिन्दगी खेरै गएछ ।”

दोस्रो विद्वानलाई खपिनसक्नु भएछ, बहस गर्दै सोधिहाल्यो- “तपाईंंहरूलाई जनसङ्ख्या घटबढको सिद्धान्त थाहा छ त ?” फेरि उत्तर छैन भन्ने आयो ।

तेस्रो विद्वान कड्कियो- “तपाईंहरू आर्थिक अवस्थाले मानिसका सोचमा फरक पार्ने सिद्धान्त कत्तिको जान्नुहुन्छ ?” दुवैले थाहा छैन भने । वास्तवमा तीन विद्वान नै आआफ्ना विषयका विज्ञ थिए तर आफू मात्र जान्ने अरु सबै मूर्ख भन्ने दम्भले चुलिएका थिए । डुँगा नदीका पल्लो छेउमा पुगेको थियो, आँधी चल्ने सङ्केत देखियो । दिक्क भएका डुँगावालले सोध्यो- “तपाईंहरूलाई पौडिन आउँछ ?” तीनै जनाले भने “आउँदैन ।”

डुँगावालले भन्यो-. “तपाईंहरू चारैजनाको चौथाई अर्थात् पूरै जिन्दगी डुब्यो ।” आखिर आँधी त आयो । तीनवटै विद्वानले पानी मज्जाले सर्काउँदै थिए । डुँगावालले सारै दुःख गरेर आखिर तीनवटैलाई नदीबाट बाहिर निकाल्यो ।

कपन, काठमाडौं