नेपाली हास्यव्यङ्ग्य अनलाइन पत्रिका

नआए हुनेथ्यो सधैँ झुस्स दारी
अझै आउने देख्छु यो कर्म जारी ।
बनौँ चट्ट खौरी नसक्ने सधैँ म
भएँ बृद्ध बाबा जवानी छँदै म ।।१।

कुनै छैन चाहा नपालूँ म दारी
म देखिन्छु उस्तै भएझैँ मदारी ।
यता हुन्छ दारी उता हुन्छ भारी
युवा प्रश्न गर्छन् मुसारेर दारी ??।।२।

बडो चट्ट पारी लगाएर सारी
बनूँ मर्दभन्दा म ठान्दै छु नारी ।
तँ नामर्द भन्लान् कुनै छैन चासो
बनेकै छु सत्पात्र होलान् गुनासो ।।३।

छ सेतै फुलेको न हालूँ म काली
कतै चुस्स घोच्दा थमाउँछ गाली ।
फलेकै छ तोरी विनाखेत बारी
यहीँ लुक्छ जुम्रा बनाएर घारी ।।४।

कतै झुस्स बोके छ दारी बढेको
यतै देख्छु आँखा कसैका गढेको ।
न ता दिन्छ हावा न ता होस् छहारी
भयो दिक्क लाग्दो यही झुस्स दारी ।।५।

चिलाएर हैरान हैरान दारी
अरू काम छैनन् यही रोजगारी ।
स्वयम् मूर्ख बन्छन् भुलेरै चिनारी
भएँ विज्ञ ठान्छन् मुसारेर दारी ।।६।

यता सर्न खोज्दा बिझाएर दारी
उता सर्न भन्छिन् मलाई पियारी ।
छ पीडा मनैमा कहाँ पोख्नु मैले
व्यथा जो सुनाएँ बुझून् यो सबैले ।।७।

०००
काठमाडौं