नेपाली हास्यव्यङ्ग्य अनलाइन पत्रिका

हुर्कायौ हुर्कियौँ स्वाट्ट तिनै लाडपियारले
देखायौ सपना ज्यादा अझ अग्ला दिवारले !
भौतिकका भए स्वप्न सिँढी सिँढी अझै सिँढी
मस्तिष्कमा सबै स्वप्न सजाएर बने पिँढी !!

कख पढेँ यता ठेल्यौँ विदेश देशका पथ
त्यता पुग्दा अझै अग्ले यिनै भौतिकका छत !
नरहेँ म ममा कैल्यै मानवीय न भो गति
कहाँनेर म खै आफ्नो छु सफा मनको मति ??

भएँ नेता चढेँ कुर्सी पत्नीका सपना सजेँ
विलासमोजका सारा परिवारभरी बजेँ !
खाका तलवका हेरेँ डाडु पन्यौँ लिएँ ममा
पहिलेका उठे स्वप्न सफा जीवन खै ममा ??

रचेँ जाल बुनेँ सारा भो अतीत धरोहर
झुप्रा फालेँ बनाएर आलिशान मनोहर !
चोटाकोठा सबै धप्के जग्मगाएँ ममा घर
आफ्नै स्वार्थ चढेँ अग्लो खै कता छु म सुन्दर ??

जे सिकायौ त्यही नै भो संस्कार भित्र सम्भव
पत्नी हेर्नोस्न मेरै छे अरु यस्ता असम्भव !
पुत्र हेर्नोस् अमेरीका पुत्री विदेश गौरव
विकासका सिँढी अग्ला कहाँ हुन्थे र कौरव ??

आय सोझो हुँदैहुन्न जिउँदै ढिकुरा चढेँ
भ्रष्टका भीड राखेर बारुला म उता बढेँ !
दोष केही भए तिम्रै बाबुआमा भयौ तिमी
तिम्रै हियारको सच्चा म टेकी हिँड्दछु जिमी !!

रुघा लागे म अग्ला यी यानविदेश चढ्दछु
सिकायौ म सिकी तिम्रै स्वप्नका सिँढी बढ्दछु !
मानवीय पिँढी बन्ने खै सिकायौ कला कतै
जम्मै यी शकुनि पाशा तिम्रै हान्छु जताततै !!

०००
काठमाडौं