नेपाली हास्यव्यङ्ग्य अनलाइन पत्रिका

भुन्भुन्
गुन्गुन्
कहिले
गुन्गुनाएझैँ
कहिले
भुन्भुनाएझैँ
निरन्तर
डाहाले
छट्पटाहट्ले
कतै
ओठमाथि पखेटा
कतै
पखेटामाथि ओठ
गाउँ होस्
या गोठ
घर होस्
या वन
भान्सा होस्
या बरण्डा
खाट होस्
वा कपडा
आफ्नो भन्ने केही हुन्न
सीप छैन बुन्न
शक्ति छैन उन्न
वा गुन्न
सधैँ
सधैँ नै
पखेटा पहिरन हो कपडा
लालस
लम्पटका धनी
डाहा
इर्ष्याका खानी
खनजोत
यिनका दिमाखमै रहन्नन्
भुन्भुन्
गुन्गुन्
कहिले
गुन्गुनाएझैँ
कहिले
भुन्भुनाएझैँ
निर्वाध
डाहले
छट्पटाहटले
दलिन बार्दली
अर्काकै तयारी
भातका सिताहरूमा
तरकारीका पित्काहरूमा
सफासुग्घर
शरीरका वस्त्रहरूमा
शरीरमा
पाइला जोतेर
सानामसिना सुँढहरू
जसमा
गल्लीका गन्धा छन्
विचल्लीका विचार छन्
विभत्स स्वार्थका
काला दागहरू छन्
आफ्नै पत्नीका
कुरुप रागहरू छन्
पतिका
काला कलुषित
कङ्क्रीट कलङ्कहरू छन्
मात्र
बच्चाका मायावी अनुराग छन्
हुल जम्मा गरेर
यस्तै यस्ताका
डाहले छट्पटाएका
यी झिङ्गाहरू!
सुक्सुकाउँदा शरीरमा
गल्ली टाँस्न सक्छन्
पहिरनमा
छ्याकटा भर्न सक्छन्
होशियार !
भातका सितामा
चुपचाप बस्न नदिनोस्
भान्सामा पस्न नदिनोस्
शिरमा खस्न नदिनोस्
अझ नसा नाडी छामेर
दिलभित्रको
ढोका चुस्न नदिनोस्
खतरनाक यिनीहरूले
दुषित संस्कार सार्न सक्छन्
स्वार्थका जीवाणु झार्न सक्छन्
तिनका कुत्सित फुलहरू
तपाईं
हाम्रै मस्तिष्कका
घरमा पार्न सक्छन्
अर्काकै डाहले बाँच्न पल्केका
श्रमविहीन
सीपविहीन
स्वत्वविहीन
यस्ता झिङ्गाहरूले
अलकापुर शहर
ध्वस्त पार्न सक्छन्
विचारका सुन्दर बगैँचामा
हैजाका किटाणु झार्न सक्छन्
भुन्भुन्
गुन्गुन्
कहिले
गुन्गुनाएझैँ
कहिले
भुन्भुनाएझैँ
यी दुषित झिङ्गाहरू !!

०००
काठमाडौं