नेपाली हास्यव्यङ्ग्य अनलाइन पत्रिका

खिएर ज्ञान खोपडी गिरेर जान्छ औसत
घुसेर पुग्छ जो सभा पिएर बस्छ हो मद
हरेक काम देशको खिलाप हुन्छ हो हद
निमेकबाट टाढिदै गए समस्त सांसद ।।१

अनेक इन्द्रजाल नै चुनावमा फिजाउँछन्
पुजेर उच्च दूत पो विदेशका रिझाउँछन्
खुनी र भ्रष्ट बापती बनाउँछन् नि पार्षद
निमेकबाट टाढिदै गए समस्त सांसद ।।२

पसेर साधु सुस्तरी बनेर जान्छ शोषक
हुँदैन काम देशको दरार हुन्छ व्यापक
हुलेर देश दाउमा अनेक पार्दछन् खत
निमेकबाट टाढिदै गए समस्त सांसद ।।३

जहान इष्टमित्र झन् बने समानुपातिक
बसे थपेर मानमा अनेक स्वार्थ माफिक
बगेर मात्र खेर गो असंख्य अर्थको नद
निमेकबाट टाढिदै गए समस्त सांसद ।।४

लुटिन्छ रे लुटाउँदै सकिन्छ स्रोत साधन
जहान बन्धुवर्ग औ दलाल नै चुनीकन
समाज देश डस्न नै सदा छ सर्वसम्मत
निमेकबाट टाढिदै गए समस्त सांसद ।।५

बनेर मूर्ति शानले रमेर बस्दछन् जहाँ
दिमाग लाउने कुनै हुँदैन खेल नै त्यहाँ
अह्रोटमा बसेर झन् चुचो मिलाउँछन् हद
निमेकबाट टाढिदै गए समस्त सांसद ।।६

०००
भक्तपुर