टङ्कराज ढकाल ‘तितेपाती’आज वार्ता नराखौं
दिगमिग पलको राजधानी कुहेको अलमल सबको पार्छ नाता उसैको धुमिल छ सपना चोर्न जानेछ लाखौं छलफल सकियो भङ्ग वार्ता नराखौं ।
बिषय गहन यो हुन्छ हाम्रो छ चासो
रहनसहनले हट्न जाला गुनासो
हलबल नमिले पर्छ वाधा र लाखौं
छलफल सकियो आज वार्ता नराखौं ।१
फसल सकल खै खेतबारी छ बाँझो
सकस मनन खै बाँच्न हाल्दैछ भाँजो
समय समयको यत्न चाला कताको
छलफल सकियो आज वार्ता नराखौं ।२
भ्रमर डुलिरहे फूल खोज्दै छ धामा
सकल डुलिसके मिल्न सक्दैन आमा
अभर परिसके थाक्न जान्दैन चोखो
छलफल सकियो आज विश्राम राखौं ।३
रजगज कसले गर्छ हालीमुहाली
सकसक मनले ताक्छ कस्को दलाली
दिगमिग तनले कोर्छ आलोक लाखौं
छलफल सकियो आज वास्ता नराखौं ।४
फुरफुर नहुने को छ सत्ता गुलामी
ढलपल छलमा हुन्छ टाढा मलामी
पिलपिल जलझैं खस्छ थोपा छ चाखौं
छलफल सकियो आज वार्ता नराखौं ।५
दिगमिग पलको राजधानी कुहेको
अलमल सबको पार्छ नाता उसैको
धुमिल छ सपना चोर्न जानेछ लाखौं
छलफल सकियो भङ्ग वार्ता नराखौं । ६
०००
चितवन
