झ्याइँकुटीका तीन झ्याइँ
तपाईंको धारावाहिक गुदीको अगाडि मेरो पेटले सहन सकेन, ढोकामै भ्याइदिएँ । अरू केही होइन, त्यसैको परिणाम हो !
१. भन्नु न भन्नू
एकदिन कार्यालयमा जताततै फोहोर देखेर हाकिमसाब स्वीपरसँग कराइरहेका थिए । त्यही बेला मैले बीचमा सही थाप्दै भने- यी साथी त साह्रै सोझो छन् सर ! त्यही भएर यिनले जे पनि सोझो मात्रै देख्छन्, दायाँबायाँ कुनाकाप्चामा भएको फोहार पनि कहिल्यै देख्दैनन् सर । त्यति मात्र कहाँ हो र ! आफ्नै जीउको फोहोर त देख्दैनन् र उनकी बूढीले सम्झाउनु पर्छ । यो त झन् कार्यालयको फोहोर न पर्यो, कसरी पो देख्छन् त सर ! मेरो कुरा सुनेर सबैजना हाँस्न थाले । उनी पनि झन् मज्जाले हाँसे र उत्साहित हुँदै भन्न थाले- अरू पनि छन् भने भन्नू न भन्नु । आफ्नो कुरा सुनेर आफैलाई कस्तो आनन्द आयो सर !
२. धारावाहिक गुदी
पानीको फोहरामा घण्टौं घण्टौ नुहाउँदै हास्यव्यङ्ग्यकार कृष्ण कन्हैया बाथरूममा आनन्द लिएर बस्दा रहेछन् । अनि धारावाहिक रूपमा रचनाको गुदी फुर्दोरैछ । त्यसैको धुनमा मस्त भएर निस्केका मात्रै के थिए उनी ढोकामा नराम्रोसँग पछारिए । दुखेको तोडमा अइया अइया भन्दै उठे । लडेको आवाज सुनेर बूढी माथिबाट तल आइन् । कृष्ण कन्हैयाले बूढीलाई देख्ने बित्तिकै रिसाउँदै चिच्याउँछन्- के गर्या तिमीले यस्तो ? बूढीले हाँस्दै भनिन्- के गर्नु त श्रीमानज्यू ! तपाईंको धारावाहिक गुदीको अगाडि मेरो पेटले सहन सकेन, ढोकामै भ्याइदिएँ । अरू केही होइन, त्यसैको परिणाम हो ! कृष्ण कन्हैया भुतभुताउँदै फेरि बाथरूमरूमतिर छिरे ।
३. प्रकाश थापाको मन्तव्य
कृषि बिकास बैकको सभा हलमा २०५३ भाद्र १९ गते भुँडीपुराण प्रकाशनको आयोजनामा हास्य कलाकार गोपालराज मैनालीद्वारा लिखित, माणिकरत्न शाक्यद्वारा संकलित सम्पादित कृतिको नाम हो- खुसुक्क भन्नुस् फच्च्या । मैले मैनालीजीलाई सिन्दुर चलचित्रको लागि तपाईंको रोल अनुसारको हास्य पटकथा लेखेर ल्याउनुस् भनेको थिएँ, ल्याउन सक्नु भएन । अहिले त हास्यव्यङ्ग्यको किताबै पो निस्क्यो भन्दा त म तीन छक परें । त्यस्ता पनि हास्यव्यङ्ग्यकार रे ! भनेर चलचित्र निर्देशक प्रकाश थापाले मन्तव्यको कममा बोल्दा दर्शकहरू मुर्छा पर्ने गरि हाँसेका थिएँ । मैनालीले चाहिँ हाँसेरै टारे ।
०००
सरस्वतीनगर, चावहिल