नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

जहाँ छैन पैसा बिरानो छ नाता
उहीं हुन्छ हेला र होचो विधाता
दया मिल्न गाह्रो अचाक्ली छ माता
भयो भिन्नता जो न मामा न भ्राता।१

हतारो सबैको धनी बन्न पाऊँ
म खाऊँ अघाऊँ अरूको लुँड्याऊँ
जता जान्छु मेरो छ सम्मान ठाउँ
सबै भोग आफ्नै धुँवाधार भाउ।१

पैसाको खेती लालची हुन्छ कस्तो
चोरीको धन्दा फैसला दिन्छ जस्तो
मुर्दा भै अर्थी हास्छ आनन्द सस्तो
घोटाला द्रोही सभ्यता मान्छ यस्तो।२

मौकामा चौका हान आनन्द होला
दोहोलो काढ्दै जाल फालिन्छ होला
धर्तीका सारा रत्न बेचिन्छ खोला
सत्तामा पुग्ने चुस्त भ-याङ होला।३

जो मान्छे भोको माग्छ खाना र नाना
बुझ्ला को उस्को देहको त्यो खजाना
आशाको खेती गर्छ ऊ शून्य दाना
पीडा हो कस्तो बन्धकी लाग्छ ताना।४

पैसा बिनाको घरबार भिन्न
उत्साह मार्ने अवतार खिन्न
ठाडो उकालो छ प्रताप भोग्न
लाटो हुनेछौ पहिचान जान्न।५

पैसा कमाऊ गर मोजमस्ती
संसार लुट्दै बन लौ अगस्ति
सम्पन्नशाली घरको प्रसस्ति
भै हन्तकाली सरकार गस्ती।६

ए धुन्धुकारी हतियार धारी
सामन्तका छौ मतियारकारी
आमा रुवायौ घटिया चकारी
ग्वाम्मै हसुर्छौ सबथोक मारी।७

०००
नवलपुर