नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

लोकतन्त्र फटाहाको मागीखाने कुचाल यो
गाँडतन्त्र चलायो जो भाँडतन्त्र कुकर्म यो
नौरङ्गी दम्भको लागि ठोकतन्त्र निलाम यो
परायाको घुँयत्रोमा योजना खै कता गयो।१

पासो यो लोभको हाँडी चोरको चल्छ जग्जगी
हाँसोमा धुर्तको धन्दा नौटङ्की चल्छ बिग्बिगी
निर्धाको पिउने रक्त जालोमा फस्छ जिन्दगी
गुलामी भ्रष्टको फन्दा योजना नै सुपुर्दगी।२

यी हुँडार र ब्वाँसाको के होला ठगबन्धन
काशी जाने बिरालोले माथमा घस्छ चन्दन
सिद्राको हार भिर्नेले भन्दैछ देश चिन्दिन
बिडम्बना छ कस्तो यो लोकमा नृत्य दिन्दिन।३

शर्तमा पस्छ जो आफै सङ्घीयता गयो कता
गणतन्त्र भजाएर खान्छ जो भन्छ एकता
जथाभावी चलाएको नाफाखोरी छ ए कता
सत्ताधारी छ मुर्दा जो योजना बुन्छ रिक्तता।४

भ्रष्टाचारी बचाएर निर्धाको लिन्छ हुर्मत
चोरी गर्ने छ आफै जो गर्दैछ तुच्छ कर्तुत
दुष्ट कालो बिरालोले लुँड्याउने छ बर्गत
हत्यारा दुष्टको होला योजना लुट्न हर्कत।५

सन्काहा जन छन् त्यहाँ भुस्तिघ्रे चाल बर्बर
लोभी पापी खुराफाती घस्दैछन् बुझ अत्तर
माफिया तस्करी जाली मिलाएर छु मन्तर
उल्टो यो खोपडी कस्तो योजना क्रोधको भर।६

०००
नवलपुर