नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

जोडमा घटाउमा न मिल्छ भाग के भयो
दुष्टको हिसाबमा अनन्य लाभ देखियो
न्याय खै समाजमा विरक्त चाल देखियो
हर्ष खै हियारमा कता गयो कता गयो।१

कृष्णको अभावमा छ कंसको स्वराज यो
जिन्दगी छ दाउमा हुँडारको समाज यो
भ्रष्टको दबावमा बिचौलिया खडा भयो
न्याय खै समाजमा कता गयो कता गयो।२

ज्यामितीय कोणमा छ अङ्कको कमाल यो
उर्ध्व जान्छ लम्ब यो र कर्ण दिन्छ नाप यो
दिन्छ भाव बिम्वले र चित्रकार कोर्छ यो
ठीक नाप गर्छ जो उतार्न सक्छ चित्र यो।३

न्याय बिक्छ दाममा न किन्न सक्छ निर्धनी
कुम्भकर्ण चालमा सुलोचना छ मेदिनी
रामराज्य कल्पना जताकतै छ दामिनी
उड्छ भुर्र व्योममा वियोगमा छ यामिनी।४

सुस्तता छ कर्ममा अगम्य लाग्छ घूष यो
शक्तिको उपासना उजाड पार्छ देश यो
सङ्घ मूर्ख ताडना विवेक भाग्छ के भयो
दिक्क लाग्छ यातना सहन्न तुच्छ काज यो।५

तामझाम भेषमा सुके लुतो भिरे भयो
रङ्ग दल्छ केशमा मुहारमा पिलो थियो
तिर्सना छ शत्रुको गुलाम भै बसे भयो
लोभ मोह क्रोधमा मुकाममा छिरे भयो।६

शुष्कता छ सोचमा कुकर्ममा छ लिप्त यो
शून्य भै विवेचना अभद्रता गरे भयो
मातृ श्राप भोगले अशिष्टता छरे भयो
तुच्छ बुध्दि जिन्दगी कता गयो कता गयो।७

०००
नवलपुर