नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

साह्रै प्रतापी नृप उग्रसेन
जो राज्य गर्थे मथुरा इमान
ढोंगी लफङ्गो जन कंस जान
उल्का धतङ्गो दिन कष्ट घान।१

पद्मावती छन् खलको निशानी
हो भ्रष्ट कुम्भी छलछाम तानी
बाटो हिंडेको पल स्वार्थ ठानी
खोटो बनायो निज गर्भ दानी।२

बच्चा गिजोल्ने महिला समात्ने
भै धुन्धुकारी बदनाम पार्ने
को के कहाँको लुटपाट गर्ने
खोटो छ सिक्का दुनिया गिजोल्ने।३

यी दुष्ट जाली सरकारमा छन्
भूभाग बेच्ने सुरसारमा छन्
मुर्दा भुस्याहा किनबेचमा छन्
यो देश मेट्ने कुलघात रोज्छन्।४

गुण्डा भरौटे परिवार छान्छन्
बन्दै पराया अनिकाल पार्छन्
खाँचो कताको परिपूर्ण गर्छन्
ऐरे र गैह्रे चलखेल गर्छन्।५

बेचेर आमा पनि दाम लिन्छन्
जो कर्मचारी छलछाम गर्छन्
जो सूचना नै किनबेच गर्छन्
औकात कस्तो भरिया सकार्छन्।६

लोभी र पापी जनता निचोर्छन्
अस्तित्व के हो पुरको चिथोर्छन्
जो अस्मिता नै पगालेर प्यूछन्
ताक्दै गुलेली अनि बाण छाड्छन्
यी कंस यस्तै अभिशाप बन्छन्।७

०००
नवलपुर