नेपाली हास्यव्यङ्ग्य अनलाइन पत्रिका

मान्छे हो शक्तिशाली अवनिबिच रही कर्ममा जुट्नसक्ने
आफ्ना सर्वाङ्गबाटै हरपल सुखको स्वर्ग त्यो लुट्नसक्ने
जस्ता हुन् वृद्ध वृद्धा मनबिच रस औ रङ्गले बस्छ छोई
खोज्छन् बच्चा युवाले जुन सुखसुविधा वृद्धले खोज्छ सोही ॥१

चाहन्छन् खेल्न डुल्नै प्रियजनसित हो भावना भव्य गाँसी
बाँड्छन् आफ्ना सुनौला अनुभव अघिका प्रेमकासाथ हाँसी
जाँदैनन् वेदनाका बह बिनु ममता आँसुले मात्र धोई
खोज्छन् बच्चा युवाले जुन सुखसुविधा वृद्धले खोज्छ सोही ॥२

हेला गर्छन् र भुल्छन् कति शठ जनले वृद्ध बाबा मुमामा
वैरिन्छन् बिघ्नबाधा जिउन पनि हरे हुन्छ अत्यन्त धामा
भोका माया दयाका अनि धन नहुँदा बस्दछन् धेर रोई
खोज्छन् बच्चा युवाले जुन सुखसुविधा वृद्धले खोज्छ सोही ॥३

भुल्ने छोरा र छोरी पनि अधम बने त्याग माता पिताको
बेवास्ता गर्नथाली हृदय बिच अहो! झोस्दछन् अग्नि राँको
एक्लो कोही नहोउन् सकभर सब नै साथ हुन् पोइ जोई
खोज्छन् बच्चा युवाले जुन सुखसुविधा वृद्धले खोज्छ सोही ॥४

यस्तो यो वृद्ध बेला सकल मनुजले भोग्नुपर्ने छ हेर
सेवा सद्भाव बाँडौँ सब नर जनले मित्र साथी बनेर
खोल्छन् इच्छा र आसा कतिपय जनले खोल्नसक्दैन कोही
खोज्छन् बच्चा युवाले जुन सुखसुविधा वृद्धले खोज्छ सोही ॥५

०००
भक्तपुर